जिल्हा वाल्मिकी समाजातर्फे बेळगावात निदर्शने करून भव्य आंदोलन

बेळगाव : वाल्मिकी नायक समाजाला ‘बेरड’ हा पर्यायी शब्द अनुसूचित जमातीच्या यादीत समाविष्ट करावा या मागणीसाठी बेळगाव जिल्हा वाल्मिकी समाजाच्या वतीने जिल्हाधिकारी कार्यालयाच्या आवारात आंदोलन करण्यात आले. वाल्मिकी नायक समाजाला ‘बेरड’ हा पर्यायी शब्द अनुसूचित जमातीच्या यादीत समाविष्ट करावा, समाजावरील अन्याय दूर करावा आदी मागण्यांसाठी बेळगाव जिल्हा वाल्मिकी समाजाच्या वतीने जिल्हाधिकारी कार्यालयाच्या आवारात आंदोलन करण्यात आले.
यावेळी प्रसारमाध्यमांशी बोलताना बेळगाव जिल्हा वाल्मिकी समाजाचे अध्यक्ष राजशेखर तळवार यांनी सांगितले की, वाल्मिकी समाजातील तरुण किंवा युवतीची शासकीय कर्मचारी म्हणून निवड होते. मात्र जात वैधता प्रमाणपत्र मिळण्यात त्यांना अडचण येत असल्याने अनेकांना सरकारी नोकऱ्या गमवाव्या लागल्या आहेत. 1991 मध्ये मूळ बेडर, नायक, नाईक आणि वाल्मिकी पद एकच मानून या शब्दांचा अनुसूचित जमातीच्या यादीत समावेश करण्यात आला. उत्तर कर्नाटकातील बहुतांश जिल्ह्यांमध्ये दर तीनपैकी एका कुटुंबात शाळेतील नोंदीत ‘बेरड’ हा वेगळा शब्द आढळतो. कुटुंबातील सदस्य अनुसूचित जमातीचे असूनही तांत्रिक त्रुटीमुळे कुटुंबातील पाचपैकी दोन सदस्य अनुसूचित जातीच्या सुविधांपासून वंचित आहेत. त्यामुळे वाल्मिकी नायक समाजातील मुलांवर शिक्षण व नोकरीत अतिशय अन्याय सातत्याने होत आहे. मुंबई-कर्नाटक भागात पूर्वी मराठी भाषेचा प्रभाव होता आणि त्यातील बहुतांश लोक मराठी माध्यमात शिकलेले होते.तसेच मराठी भाषिक बेडरला “बेरड” असे उच्चारतात. बेडर शब्दाचा अपभ्रंश होऊन बेरड शब्द आला आहे. तरीही वाल्मिकी नायक समाजाचा हा खरा पर्यायी शब्द असल्याने ज्यांच्याकडे अशी वेगवेगळी कागदपत्रे आहेत, त्यांना तत्काळ अनुसूचित जमातीचे जात प्रमाणपत्र देण्यात यावे. तांत्रिक त्रुटीमुळे आणि मराठी भाषिकांच्या उच्चारातील फरकामुळे ही चूक झाली आहे. या त्रूटी दुरुस्त करण्याची मागणी त्यांनी केली. बेडर नागरिकांच्या नातेवाईकांना न्याय देण्यासाठी तातडीची यंत्रणा असावी. सरकारमध्ये कार्यरत असलेले वाल्मिकी नायक व्यक्तींनी आपल्या समाजातील नातेवाइकांना न्याय द्यावा. नोंदणी केल्यास त्यांना अनुसूचित जातीचे उमेदवार मानले जावे, अशी मागणी केली.

यावेळी बेळगाव जिल्हा वाल्मिकी समाजाचे सरचिटणीस दिनेश चंद्रशेखर बागड, अकवाना महासभा बेंगळूरचे अध्यक्ष पांडुरंग नायक, माजी अध्यक्ष संजय नायक, सिद्राय नायक, शिवराज रामदुर्गे, अशोक नायक, नागेंद्र नायक, तालुकाध्यक्ष आनंद शिरूर, एस. एस. नायकर, परसू नरसू नायक, नागराज दुंधुर, मारुती पुजेरी, राघवेंद्र पुजेरी, हुवाप्पा कल्लुर, कल्लाप्पा नायक, रवी नायक, शंकर दळवाई यांच्यासह वाल्मिकी समाजाचे बांधव आंदोलनात सहभागी झाले होते.