महापौरपदी सविता कांबळे यांची बिनविरोध निवड

उपमहापौर पदी आनंद चव्हाण

बेळगाव : बेळगाव महानगरपालिकेच्या महापौर-उपमहापौरपदासाठी निवडणूक पार पडली आहे. बेळगाव महानगरपालिकेवर भाजपची सत्ता आहे. महापौरपद अनुसुचित जाती महिलेसाठी आरक्षित आहे तर उपमहापौरपद सर्वसामान्य वर्गासाठी आहे. भाजपकडून महापौरपदासाठी प्रभाग क्रमांक 17 मधील नगरसेविका सविता कांबळे आणि प्रभाग क्रमांक 35 मधील नगरसेविका लक्ष्मी राठोड यांनी अर्ज दाखल केला होता. अखेरीस नगरसेविका लक्ष्मी राठोड यांनी आपला अर्ज मागे घेतल्यामुळे नगरसेविका सविता कांबळे यांची महापौरपदी बिनविरोध निवड झाली आहे.

आनंद चव्हाण उपमहापौरपदी
उपमहापौर सर्वसामान्य वर्गांसाठी असल्याने भाजपमधील अनेक सदस्य इच्छुक होते. उपमहापौरपदासाठी भाजपाकडून प्रभाग क्रमांक 45 मधील नगरसेवक आनंद चव्हाण आणि प्रभाग क्रमांक 54 मधील नगरसेविका माधवी राघोचे यांनी अर्ज दाखल केला होता. अखेरीस माधवी राघोचे यांनी आपला अर्ज मागे घेतला. त्यानंतर उपमहापौरपदासाठी भाजपाचे आनंद चव्हाण आणि प्रभाग क्रमांक 45 मधील नगरसेविका ज्योती कडोलकर यांच्यात निवडणूक झाली. आनंद चव्हाण यांना सर्वाधिक 39 मते मिळाल्यामुळे त्यांची उपमहापौरपदी निवड झाली.

महानगरपालिकेवर भाजपचे 35 नगरसेवक आहेत. काँग्रेसचे 10 नगरसेवक असून म. ए. समिती 3, अपक्ष 9, एआयएमआयएम 1 अशा प्रकारे एकूण 58 नगरसेवक आहेत.