दूध दरवाढ कमी न केल्यास बेळगावात भाजपकडून तीव्र आंदोलनाचा इशारा

बेळगाव : दुधाला 5 ते 10 रुपयांचे अनुदान वाढवावे आणि दुधाच्या दरात कपात करावी या मागणीसाठी बेळगावात भाजपतर्फे राज्य काँग्रेस सरकारच्या विरोधात निदर्शने करण्यात आली.
सोमवारी बेळगाव जिल्हाधिकारी कार्यालयासमोर भाजप पदाधिकारी व कार्यकर्त्यांनी एकत्र येत सरकारविरोधात जोरदार घोषणाबाजी करत आपला संताप व्यक्त केला.
भाजपचे शहराध्यक्ष सुभाष पाटील यांनी, प्रोत्साहन धन 5 रुपयांनी वाढ करण्याचे आश्वासन दिल्यानंतरही राज्य सरकारने गेल्या 8 महिन्यांपासून दुग्ध उत्पादक शेतकऱ्यांना कोणतेही प्रोत्साहन धन दिलेले नाही. दुधाचे दर कमी करून प्रोत्साहन धन 5 ते 10 रुपये वाढवा. हमीभावासाठी दरवाढीचे धोरण अवलंबत राज्य सरकार सर्वसामान्यांवर बोजा टाकत आहे. दुधाचे वाढलेले दर त्वरित मागे न घेतल्यास तीव्र आंदोलन करण्याचा इशारा त्यांनी दिला.

हमीभावाच्या नावाखाली सत्तेवर आलेल्या सरकारने आता जनतेवर बोजा टाकला आहे. मुख्यमंत्री- उपमुख्यमंत्री बदलाच्या प्रक्रियेत असलेल्या सर्वसामान्यांची चिंता करायला सरकारला वेळ नाही. विकासाचा विसर पडला आहे. राज्यातील जनतेवर सरकारचा अन्याय वाढला आहे. ही दरवाढ कमी करावी किंवा जागा रिकामी करावी, अशी मागणी भाजपचे ग्रामीण जिल्हाध्यक्ष व माजी आमदार संजय पाटील यांनी केली.
यावेळी गीता सुतार, संतोष हडपद , लीना टोपण्णावर, भाजप नेते प्रमोद कोचेरी, खानापूर तालुका भाजप अध्यक्ष संजय कुबल, आदी पदाधिकारी व कार्यकर्त्यांचाही सहभाग होता.