जिल्हा पंचायत सीईओ राहुल शिंदे यांनी केली मनरेगा कामाची पाहणी

बेळगाव : रामदुर्ग तालुक्यातील विविध ग्रामपंचायतींच्या अंतर्गत महात्मा गांधी राष्ट्रीय ग्रामीण रोजगार हमी योजनेच्या कामांना जिल्हा पंचायतचे मुख्य कार्यकारी अधिकारी राहुल शिंदे यांनी मंगळवारी भेट दिली.

रामदुर्ग तालुक्यातील हिरेकोप्प के.एस. गावाला भेट दिल्यानंतर त्यांनी मनरेगा प्रकल्पांतर्गत हाती घेतलेल्या कालव्यातील गाळ काढण्याच्या कामाच्या ठिकाणी काम करणाऱ्या मजुरांची भेट घेऊन मजुरी व इतर टंचाईची माहिती घेतली. नंतर त्यांनी गावातील सदस्यांची बैठक घेतली. त्यांनी ग्रामपंचायत कर्मचाऱ्यांची उपस्थिती, ई-मालमत्ता आणि कर संकलन तसेच विविध प्रकल्पांच्या प्रगतीचा आढावा घेतला.

सीईओ राहुल शिंदे यांनी के. चंदरगी ग्रामपंचायत अंतर्गत येणाऱ्या अंगणवाडी केंद्राला भेट दिली आणि मुलांची संख्या आणि मुलांना वाटप करण्यात येणाऱ्या पौष्टिक आहारासाठी स्वयंपाक घराची पाहणी केली. तसेच प्राथमिक शाळेला भेट देऊन मुलांच्या गरम जेवणाची तपासणी केली. आणि मग घनकचरा विल्हेवाट लावणारे युनिट पाहिले. त्यानंतर रामदुर्ग तालुका पंचायतीमध्ये सर्व विभागीय अधिकारी व तालुक्यातील ग्रामपंचायत विकास अधिकाऱ्यांना प्रगतीचा आढावा घेऊन उन्हाळी हंगामात पिण्याच्या पाण्याची समस्या उद्भवू नये यासाठी खबरदारी घेण्याच्या सूचना देण्यात आल्या.

ईईएसबी कोहली, तपम ईओ बसवराज ऐनापूर, एईई निजाम सुरपूर, सीडीपीओ शंकर कुंभार, सहायक संचालक शेखर हिरेसोमनवर, अप्प्याप्पा कुंभार व अधिकारी व कर्मचारी उपस्थित होते.