Belgaum Varta Belgaum Varta
बेळगाव : भारत विकास परिषदेच्यावतीने कर्नाटक उत्तर प्रांतस्तरीय कार्यशाळा बेळगाव येथे आय.एम.ई.आर.च्या सभागृहात रविवारी उत्साहात पार पडली. कार्यशाळेस दक्षिण भारत विभागीय मुख्य सचिव पुरुषोत्तम शास्त्री (आंध्र प्रदेश), विभागीय वित्त सचिव राजगोपाल पै (केरळ), सहसचिव एम्. भार्गव (बेंगलोर), शिवराम शेनॉय (बेंगलोर) त्याचप्रमाणे उत्तर प्रांतच्या सर्व शाखांचे पदाधिकारी उपस्थित होते. रविवारी सकाळी 10 पासून सायंकाळी 4 वाजेपर्यंत एकूण चार सत्रांमध्ये कार्यशाळा झाली.
प्रारंभी अक्षता मोरे यांनी संपूर्ण वंदे मातरम् प्रस्तुत केले. मान्यवरांच्या हस्ते दीप्रज्वलन करून भारतमाता व स्वामी विवेकानंदांच्या प्रतिमांचे पूजन करण्यात आले. बेळगाव शाखाध्यक्ष विनायक मोरे यांनी स्वागत व प्रास्ताविक भाषण केले. प्रांताध्यक्ष एस्. एस् . हिरेमठ यांनी कार्यशाळेचे उद्दिष्ट स्पष्ट केले. बेळगाव शाखा संस्थापक अध्यक्ष प्राचार्य व्ही. एन. जोशी यांचे उदघाटनपर विशेष भाषण झाले.
दुसऱ्या सत्रात एम्. भार्गव यांनी परिषदेची ध्येय-धोरणे याविषयी उपस्थितांना मार्गदर्शन केले. पुरुषोत्तम शास्त्री यांनी परिषदेच्या शिष्टाचार तसेच ‘पंच परिवर्तन’ बाबत विस्तृत माहिती दिली. राजगोपाल पै यांनी अर्थ नियोजन विषयी महत्वपूर्ण मार्गदर्शन केले.
तिसऱ्या सत्राते डॉ. जे. जी. नाईक यांनी आदर्श शाखा कशी असावी, याबाबत बहुमोल मार्गदर्शन केले. पांडुरंग नायक यांनी परिषदेच्या विविध राष्ट्रीय सेवाप्रकल्पांची माहिती दिली. राष्ट्रीय कार्यकारिणी सदस्य स्वाती घोडेकर यांनी संस्कार कार्यक्रमांविषयी मार्गदर्शन केले. महिला प्रमुख जानकी पुरोहित यांनी महिला सबलीकरण बाबत मार्गदर्शन केले.
शेवटच्या सत्रात प्रांतप्रभारी पुरूषोत्तमदास इनानी यांनी परिषदेची शिस्त, आर्थिक बाबी आणि एकंदर कार्याविषयी उपयुक्त मार्गदर्शन केले. यावेळी उत्कृष्ट कार्य व शिस्तबद्ध आयोजनाबद्दल बेळगाव शाखेचे विशेष अभिनंदन करण्यात आले. कार्यक्रमाचे नेटके सूत्रसंचालन प्रा. अरुणा नाईक यांनी केले. प्रांत सचिव तिरुपती जोशी यांनी आभार मानले. राष्ट्रगीताने कार्यक्रमाची सांगता झाली.
कार्यशाळा यशस्वीतेसाठी विनायक घोडेकर, के. व्ही. प्रभू, डी. वाय. पाटील, कुमार पाटील, सुभाष मिराशी, पी. एम्. पाटील, सुहास गुर्जर, रामचंद्र तिगडी, पी. जे. घाडी तसेच परिषदेच्या सर्व सदस्यांनी विशेष परिश्रम घेतले.
