इंगळगी मारहाण प्रकरणातील सर्व आरोपींना अटक करा; भाजप-श्रीराम सेनेची मागणी

बेळगाव : हुक्केरी तालुक्यातील इंगळगी येथे श्रीराम सेनेच्या कार्यकर्त्यांवर झालेल्या हल्ल्याप्रकरणी सर्व आरोपींना अटक करण्याची मागणी करत भाजप आणि श्रीराम सेनेच्या कार्यकर्त्यांनी बेळगावात जोरदार निदर्शने केली.
आज बेळगावातील एसपी कार्यालयासमोर भाजप आणि श्रीराम सेनेच्या कार्यकर्त्यांनी हुक्केरी तालुक्यातील इंगळगी येथे श्रीराम सेनेच्या कार्यकर्त्यांवर झालेल्या हल्ल्याचा तीव्र निषेध करत निदर्शने केली.

श्रीराम सेनेचे जिल्हाध्यक्ष रविकुमार कोकितकर यांनी सांगितले की, हुक्केरी तालुक्यात श्रीराम सेनेच्या कार्यकर्त्यांवर दहशतवाद्यांप्रमाणे अमानुष हल्ला करण्यात आला आहे. व्हायरल झालेल्या व्हिडिओमध्ये दिसणाऱ्या सर्वांवर कठोर कारवाई करण्याची मागणी त्यांनी केली.

यावेळी भाजप ग्रामीण अध्यक्ष सुभाष पाटील यांनीही आपले मत मांडले. हल्ल्याच्या घटनेप्रकरणी केवळ एका-दोघांवर गुन्हा दाखल न करता, व्हिडिओमध्ये दिसणाऱ्या सर्वांवर कारवाई करावी, अशी त्यांची मागणी होती. देशात काँग्रेस सत्तेवर आल्यापासून धर्मांध शक्तींना मोकळे रान मिळाले असून, हिंदूंवरील हल्ले थांबवण्यात सरकार अपयशी ठरले आहे, असा आरोप त्यांनी केला. पोलीस ठाण्यात कोणतेही समझोता झालेला नसून, तक्रार देण्यासाठी गेलेल्या श्रीराम सेनेच्या अध्यक्षांना पोलिसांनी अपमानास्पद वागणूक दिल्याचेही त्यांनी म्हटले.या संदर्भात जिल्हा पोलीस अधीक्षक डॉ. भीमाशंकर गुळेद यांना निवेदन देण्यात आले. यावेळी श्रीराम सेना आणि भाजपचे मोठ्या संख्येने कार्यकर्ते उपस्थित होते.