बी. के. मॉडेलच्या शतकमहोत्सवाचा शुक्रवारी समारोप

बेळगाव : येथील बी. के. मॉडेल हायस्कूलच्या शतक महोत्सवाचा समारोप शुक्रवार दि. 26 रोजी विशेष कार्यक्रमाने होणार आहे. या कार्यक्रमास भारतीय चित्रपटसृष्टीतील ज्येष्ठ दिग्दर्शक नागथिहळ्ळी चंद्रशेखर तसेच भारतीय सैन्यातील वरिष्ठ अधिकारी ब्रिगेडियर जॉयदीप मुखर्जी, कमांडंट, द मराठा लाइट इन्फंट्री रेजिमेंटल सेंटर, हे मान्यवर पाहुणे म्हणून उपस्थित राहणार आहेत.

श्री. नागथिहळ्ळी चंद्रशेखर हे कन्नड चित्रपटसृष्टीतील अत्यंत आदरणीय नाव असून त्यांनी दिग्दर्शक, पटकथालेखक व अभिनेते म्हणून दीर्घ काळ योगदान दिले आहे. वास्तववादी कथानक, मानवी नातेसंबंध, सामाजिक जाणिवा आणि संवेदनशील मांडणी ही त्यांच्या चित्रपटांची ओळख आहे. अमेरिका अमेरिका, माथाड माथाडू मल्लिगे, कोट्रेशी कनसिन मल्ले यांसारखे त्यांचे चित्रपट समीक्षक व प्रेक्षकांनी विशेष प्रशंसिले आहेत. त्यांच्या कार्यासाठी त्यांना राष्ट्रीय चित्रपट पुरस्कार तसेच अनेक कर्नाटक राज्य पुरस्कारांनी सन्मानित करण्यात आले आहे. चित्रपट माध्यमातून समाजप्रबोधन आणि मूल्याधिष्ठित विचार मांडणे हे त्यांच्या कार्याचे वैशिष्ट्य मानले जाते.

ब्रिगेडियर जॉयदीप मुखर्जी हे भारतीय सैन्यातील अनुभवी व कर्तव्यनिष्ठ अधिकारी असून सध्या ते द मराठा लाइट इन्फंट्री रेजिमेंटल सेंटरचे कमांडंट म्हणून कार्यरत आहेत. सैनिकी शिस्त, नेतृत्व, राष्ट्रभक्ती आणि युवकांमध्ये देशसेवेची भावना निर्माण करणे यासाठी त्यांचे योगदान उल्लेखनीय आहे. विविध प्रशिक्षण व नेतृत्व भूमिकांमधून त्यांनी सैन्यसेवेत उल्लेखनीय कामगिरी बजावली आहे.

या दोन्ही मान्यवरांच्या उपस्थितीमुळे बी. के. मॉडेल स्कूलचा कार्यक्रम अधिक प्रेरणादायी आणि गौरवपूर्ण ठरणार असून विद्यार्थ्यांना कला, संस्कृती, शिस्त, नेतृत्व व राष्ट्रसेवा या विषयांवर मार्गदर्शन मिळणार आहे. या सर्वांनी उपस्थित राहावे, असे आवाहन संस्थेचे चेअरमन अविनाश पोतदार यांनी केले आहे.