‘प्यास’तर्फे सुळगा येथे तलाव पुनरुज्जीवन प्रकल्पाचा शुभारंभ

बेळगाव : प्यास फाउंडेशन या संस्थेने बेळगाव तालुक्यातील सुळगा गावामध्ये या वर्षातील आपल्या तलाव पुनरुज्जीवनाच्या तिसऱ्या उपक्रमाचा शुभारंभ केला आहे. या प्रकल्पामुळे या गावात शाश्वत जलसंवर्धनाच्या दिशेने आणखी एक महत्त्वपूर्ण पाऊल उचलले गेले आहे.

प्यास फाउंडेशनतर्फे सुळगा येथील 3.5 एकर क्षेत्रात विस्तारलेला तलाव पुनर्संचयित करण्याचे काम हाती घेण्यात आले असून एका महिन्याच्या कालावधीत हे काम पूर्ण करण्याचे उद्दिष्ट ठेवण्यात आले आहे. प्रकल्प शुभारंभ कार्यक्रमात प्यास फाउंडेशनचे अध्यक्ष माधव प्रभू, सेक्रेटरी प्रिती कोरे, अभिमन्यू दागा, दीपक ओऊळकर, लक्ष्मीकांत पसारी, रोहन कुलकर्णी, अवधूत सामंत, सूर्यकांत हिंडलगेकर, अजय आचार्य यांच्यासह सुळगा गावचे माजी अध्यक्ष अरविंद पाटील इतर सदस्य आणि स्थानिक गावकरी अत्यंत उत्साहाने सहभागी झाले होते. यातून प्रकल्पासाठी असलेला समाजाचा भक्कम पाठिंबा आणि सक्रिय सहभाग दिसून आला. जलस्रोतांचे दीर्घकालीन यश आणि त्यांची योग्य निगा राखण्यासाठी अशा प्रकारचे सामूहिक प्रयत्नच मुख्य आधार ठरतात, यावर फाउंडेशनने यावेळी विशेष भर दिला.

सुळगा तलाव प्रकल्प पूर्ण झाल्यानंतर पुनरुज्जीवित झालेला हा तलाव गावासाठी एक अत्यंत महत्त्वाचा जलस्रोत ठरेल अशी अपेक्षा आहे. यामुळे गावातील सुमारे 2200 रहिवाशांना आणि जवळपास 4000 जनावरांना फायदा होणार आहे. या प्रकल्पाचा मुख्य उद्देश भूजल पुनर्भरण वाढवणे, पाण्याची उपलब्धता सुधारणे आणि स्थानिक परिसंस्थेला विशेषतः उन्हाळ्यातील कोरड्या महिन्यांमध्ये अधिक बळकट करणे हा आहे. हा उपक्रम बेम्को हायड्रॉलिक्स लिमिटेडचे व्यवस्थापकीय संचालक आणि मुख्य कार्यकारी अधिकारी अनिरुद्ध मोहता यांच्या सहकार्याने राबवला जात आहे. हे सहकार्य कंपनीच्या ‘कॉर्पोरेट सामाजिक जबाबदारी’ (सीएसआर) फंडातून होत आहे. ग्रामीण भागातील पाण्याच्या समस्या सोडवण्यासाठी आणि पर्यावरणीय शाश्वततेला चालना देण्यासाठी कॉर्पोरेट क्षेत्राचा सहभाग किती महत्त्वाचा आहे, हे या संयुक्त उपक्रमातून अधोरेखित होते. या प्रकल्पाच्या माध्यमातून प्यास फाउंडेशन या संपूर्ण प्रदेशात पारंपरिक जलप्रणालींचे पुनरुज्जीवन करण्याच्या आणि हवामान बदलांना तोंड देण्यास सक्षम अशा समुदायांची उभारणी करण्याच्या आपल्या कटिबद्धतेची सातत्यपूर्ण पूर्तता करत आहे.