Belgaum Varta Belgaum Varta
बेळगाव : वैद्यकीय शिक्षणाच्या प्रवेशासाठी अत्यंत महत्त्वाची मानली जाणारी नीट यूजी २०२६ ही पुनर्परीक्षा रविवार, दि. २१ जून रोजी देशभरात एकाचवेळी घेण्यात येणार आहे. ३ मे रोजी झालेल्या परीक्षेच्या प्रश्नपत्रिका फुटीच्या प्रकरणानंतर राष्ट्रीय परीक्षा संस्था (एनटीए)ने परीक्षा रद्द करून पुनर्परीक्षा घेण्याचा निर्णय घेतला आहे.
पुनर्परीक्षा पारदर्शक व सुरळीत वातावरणात पार पडावी यासाठी प्रशासनाने तयारीला वेग दिला असून यावेळी नियमांची अत्यंत काटेकोर अंमलबजावणी केली जाणार आहे. बेळगाव जिल्ह्यातील तब्बल ७,२१८ विद्यार्थी पुन्हा ही परीक्षा देणार असल्याने नियोजनावर विशेष भर देण्यात आला आहे.
एमबीबीएस, बीडीएस तसेच इतर वैद्यकीय अभ्यासक्रमांच्या प्रवेशासाठी देशभरात एकाचवेळी नीट यूजी परीक्षा घेतली जाते. मात्र यंदा पेपरफुटीच्या घटनेमुळे लाखो विद्यार्थ्यांच्या भवितव्याशी संबंधित ही परीक्षा वादाच्या भोवऱ्यात सापडली होती. त्यानंतर एनटीएने पुनर्परीक्षेची घोषणा केली.
बेळगाव शहरातील २४ परीक्षा केंद्रांवर ही परीक्षा आयोजित करण्यात येणार आहे. परीक्षा केंद्रांच्या परिसरात विद्यार्थ्यांव्यतिरिक्त इतर कोणालाही प्रवेश दिला जाणार नसून सुरक्षा व्यवस्थाही कडक करण्यात येणार आहे. उमेदवारांची ओळख पडताळणी, प्रवेश प्रक्रिया आणि परीक्षा केंद्रांवरील देखरेख यासाठी विशेष उपाययोजना केल्या जात आहेत.
परीक्षेसाठी अवघे पंधरा दिवस शिल्लक राहिल्याने विद्यार्थ्यांनी तयारीला अंतिम टप्प्यात नेले आहे. अधिकाधिक गुण मिळवून वैद्यकीय शिक्षणाचा मार्ग मोकळा करण्यासाठी विद्यार्थी कसून अभ्यास करत आहेत. दरम्यान, प्रशासनाकडून केंद्रीय विद्यालयाच्या माध्यमातून परीक्षा व्यवस्थापनाचे नियोजन करण्यात येत असून सर्व यंत्रणा सज्ज करण्यात आल्या आहेत.
