Belgaum Varta Belgaum Varta
बेळगाव : राष्ट्रीय पोलिओ लसीकरण मोहिमेंतर्गत रविवारी जिल्हाभर विशेष लसीकरण मोहीम यशस्वीरीत्या राबविण्यात आली. जिल्हा प्रशासन आणि जिल्हा आरोग्य व कुटुंब कल्याण विभागाच्या संयुक्त प्रयत्नांमुळे मोहिमेला उत्स्फूर्त प्रतिसाद मिळाला असून जिल्ह्यात ९५.६ टक्के बालकांचे पोलिओ लसीकरण पूर्ण झाले आहे.
पोलिओ हा कायमस्वरूपी अपंगत्वास कारणीभूत ठरणारा गंभीर आजार असून त्यापासून संरक्षणासाठी पोलिओ लस हा सर्वात प्रभावी आणि सुरक्षित उपाय आहे. भारताने पोलिओमुक्त देशाचा दर्जा मिळविला असला, तरी तो कायम राखण्यासाठी प्रत्येक बालकापर्यंत लसीकरण पोहोचणे आवश्यक असल्याने प्रशासनाने व्यापक जनजागृती मोहीम राबविली.
जिल्ह्यात प्राथमिक आरोग्य केंद्रे, उपकेंद्रे, सरकारी रुग्णालये, अंगणवाडी केंद्रे तसेच बसस्थानके, रेल्वे स्थानके आणि इतर सार्वजनिक ठिकाणी विशेष लसीकरण केंद्रांची उभारणी करण्यात आली होती. त्यामुळे अधिकाधिक पालकांनी आपल्या पाल्यांना पोलिओचे डोस देण्यासाठी प्रतिसाद दिला.
रविवारी विशेष लसीकरणानंतर सोमवारीही आरोग्य कर्मचारी, आशा कार्यकर्त्या आणि अंगणवाडी सेविकांनी घरोघरी भेटी देत लसीकरणापासून वंचित राहिलेल्या बालकांची नोंद घेऊन त्यांना लस देण्याची प्रक्रिया सुरू ठेवली.
वैद्यकीय अधिकारी, आरोग्य कर्मचारी, आशा कार्यकर्त्या, अंगणवाडी सेविका, स्वयंसेवी संस्था आणि स्थानिक प्रशासन यांच्या समन्वयातून ही मोहीम प्रभावीपणे राबविण्यात आली. या सामूहिक प्रयत्नांमुळे जिल्ह्याला पोलिओ लसीकरणाचे उद्दिष्ट गाठण्यात यश मिळाल्याचे आरोग्य विभागाने सांगितले.
