अखेर बिबट्या जेरबंद!

सुतकटीच्या जंगलातील आठ दिवसांची दहशत संपली; वन विभागाच्या सापळ्यात अडकला नरभक्षकाच्या धर्तीचा बिबट्या

बेळगाव : बेळगाव तालुक्यातील वंटमुरी घाटामागील सुतकटी (सुतगट्टी) गावाच्या वनक्षेत्रात गेल्या आठ-दहा दिवसांपासून ग्रामस्थांची झोप उडविणारा बिबट्या अखेर वन विभागाच्या सापळ्यात जेरबंद झाला. बुधवारी पहाटे पिंजऱ्यात अडकलेल्या बिबट्याला वन विभागाने सुरक्षित ताब्यात घेतल्याने सुतकटी, शिवापूर आणि परिसरातील नागरिकांनी सुटकेचा निश्वास टाकला.

सुतकटी व शिवापूर परिसरात बिबट्याचा सातत्याने वावर असल्याने भीतीचे वातावरण निर्माण झाले होते. अनेक ग्रामस्थ, शेतकरी तसेच वाहनचालकांना हा बिबट्या वारंवार दिसला होता. त्याचे व्हिडिओ सोशल मीडियावर मोठ्या प्रमाणात व्हायरल झाल्यानंतर नागरिकांनी काकती वन विभागाकडे तातडीने धाव घेतली.

तक्रारीची गंभीर दखल घेत वन विभागाने परिसरात गस्त वाढवून बिबट्याच्या हालचालींवर बारकाईने लक्ष ठेवले. सुतकटीच्या वनक्षेत्रात काही दिवसांपूर्वी लावण्यात आलेल्या पिंजऱ्यात अखेर बुधवारी सकाळी बिबट्या अडकला आणि वन विभागाच्या नियोजनबद्ध मोहिमेला यश मिळाले.

ही कारवाई काकतीचे आरएफओ बी. एल. सनदी, हुक्केरीचे आरएफओ शिवकुमार माळी, डीआरएफओ बसवराज हनगंडी, प्रभू तंगडी, राकेश मुरारी, मुतगेकर तसेच काकती वन विभागाच्या कर्मचाऱ्यांनी यशस्वीपणे पार पाडली. सुतकटी गावातील ग्रामस्थांनीही या मोहिमेत मोलाचे सहकार्य करून वन विभागाच्या कार्याला हातभार लावला.