प्रतिभा पुरस्कार सोहळ्यात शांताई विद्या आधारतर्फे गरजू विद्यार्थ्यांना शैक्षणिक मदत

बेळगाव : शिक्षणाला प्रोत्साहन देत गरजू विद्यार्थ्यांच्या पाठीशी उभे राहण्याचा स्तुत्य उपक्रम शांताई विद्या आधार संस्थेतर्फे राबविण्यात आला. गोगटे कॉलेज येथील वेणुगोपाल सभागृहात आयोजित ‘प्रतिभा पुरस्कार’ सोहळ्यात दोन गरजू विद्यार्थ्यांच्या शैक्षणिक फीची जबाबदारी संस्थेने स्वीकारली.

कार्यक्रमादरम्यान विद्यार्थ्यांना ही आर्थिक मदत अधिकृतपणे प्रदान करण्यात आली. यावेळी शांताई विद्या आधार संस्थेच्या माध्यमातून आर्थिकदृष्ट्या दुर्बल विद्यार्थ्यांना शिक्षणासाठी सहाय्य करण्याचा संकल्प पुन्हा अधोरेखित करण्यात आला.

कार्यक्रमात माजी महापौर विजय मोरे यांनी उपस्थितांना संबोधित करताना शिक्षणाचे महत्त्व आणि गरजू विद्यार्थ्यांना मदत करण्याची समाजाची सामूहिक जबाबदारी यावर भर दिला. तसेच विद्यार्थ्यांनी, पालकांनी आणि शिक्षकांनी शांताई विद्या आधारसाठी रद्दी (जुनी वर्तमानपत्रे व पुनर्वापरयोग्य साहित्य) दान करण्याचे आवाहन केले. अशा उपक्रमांतून अधिक निधी उभारून अनेक विद्यार्थ्यांना मदत करता येईल, असे त्यांनी सांगितले.

यावेळी शिरीष चिंचोळीमठ, गोगटे कॉलेजचे प्राचार्य डॉ. वेणुगोपाल जालीहाल, विभागप्रमुख देशपांडे मॅडम, ऍलन विजय मोरे, गंगाधर पाटील, सूरज गावली आदी मान्यवरांच्या हस्ते धनादेश प्रदान करण्यात आला. कार्यक्रमाला प्राध्यापक, विद्यार्थी तसेच विविध क्षेत्रातील मान्यवर उपस्थित होते.

समाजाच्या सहभागातून विद्यार्थ्यांच्या शिक्षणाला हातभार लावणारा हा उपक्रम उपस्थितांकडून मोठ्या प्रमाणात कौतुकास पात्र ठरला.