केएचएमए बेळगाव शाखेच्या नव्या पदाधिकाऱ्यांचा पदग्रहण सोहळा व वैज्ञानिक परिसंवाद उत्साहात संपन्न

 

बेळगाव : कर्नाटक होमिओपॅथिक मेडिकल असोसिएशन (KHMA), बेळगाव शाखेच्या नव्या पदाधिकाऱ्यांचा पदग्रहण सोहळा व वैज्ञानिक परिसंवाद रविवारी गांधी भवन, बेळगाव येथे उत्साहपूर्ण वातावरणात संपन्न झाला. या कार्यक्रमास होमिओपॅथी क्षेत्रातील नामवंत डॉक्टर, वैद्यकीय महाविद्यालयांचे प्राचार्य, प्राध्यापक, पदव्युत्तर विद्यार्थी, इंटर्न तसेच विविध जिल्ह्यांतील वैद्यकीय व्यावसायिक मोठ्या संख्येने उपस्थित होते.

कार्यक्रमाचे उद्घाटन डॉ. वीरब्रह्मचारी, अध्यक्ष, कर्नाटक होमिओपॅथिक मेडिकल असोसिएशन यांच्या हस्ते झाले. प्रमुख पाहुणे म्हणून डॉ. श्रीकांत कोंकणी, उपाध्यक्ष, आयुष फेडरेशन ऑफ इंडिया (कर्नाटक शाखा) तसेच डॉ. एम. ए. उदचणकर, संचालक (प्रशासन), केएलई होमिओपॅथिक मेडिकल कॉलेज, बेळगाव उपस्थित होते.

मान्यवर अतिथी म्हणून डॉ. अरुण हूळी, प्राचार्य, बीव्हीव्ही होमिओपॅथिक मेडिकल कॉलेज, बागलकोट; डॉ. दशरथ बामणे, प्राचार्य, एसएसबीजे होमिओपॅथिक मेडिकल कॉलेज, बेळगाव; डॉ. अरुणकुमार जमदाडे, प्राचार्य, भारतेश होमिओपॅथिक मेडिकल कॉलेज, बेळगाव; डॉ. किरण एन. पाटील, प्राचार्य, ए. एम. शेख होमिओपॅथिक मेडिकल कॉलेज, बेळगाव; तसेच डॉ. रुपाली तेलंग, प्राचार्य, केएलई होमिओपॅथिक मेडिकल कॉलेज, बेळगाव उपस्थित होते.

विशेष निमंत्रित म्हणून डॉ. ए. राजेश, कार्याध्यक्ष, केएचएमए कर्नाटक तसेच डॉ. ज्योतिष खोत, कर्नाटक बोर्ड ऑफ होमिओपॅथिक सिस्टिम ऑफ मेडिसिनचे निवडून आलेले सदस्य उपस्थित होते.

कार्यक्रमाच्या अध्यक्षस्थानी डॉ. विवेकानंद वर्नेकर, अध्यक्ष, केएचएमए बेळगाव शाखा होते. यावेळी नव्या पदाधिकाऱ्यांनी अधिकृतपणे पदभार स्वीकारला. नव्या कार्यकारिणीत डॉ. विवेकानंद वर्नेकर (अध्यक्ष), डॉ. सोनाली सरनोबत (कार्याध्यक्ष), डॉ. श्रेयस जीनराळकर (सचिव) आणि डॉ. संतोष मगदूम (संघटन सचिव) यांचा समावेश आहे. नव्या कार्यकारिणी सदस्यांचाही परिचय करून देण्यात आला.

कार्यक्रमाची सुरुवात प्रार्थना गीताने झाली. डॉ. सोनाली सरनोबत यांनी स्वागतपर भाषण केले. होमिओपॅथीचे जनक डॉ. सॅम्युअल हॅनिमन यांच्या प्रतिमेस पुष्पहार अर्पण करण्यात आला. डॉ. जयंत ए. बी., उपाध्यक्ष, केएचएमए यांनी डॉ. हॅनिमन यांच्या जीवनकार्याचा आढावा सादर केला. डॉ. ए. राजेश यांनी राज्यस्तरीय केएचएमएच्या विविध उपक्रमांची माहिती दिली.

यानंतर आयोजित वैज्ञानिक परिसंवादात प्रा. डॉ. संतोष एम. रानडे, विभागप्रमुख, शरीरक्रियाशास्त्र विभाग, एसजेपीईएस होमिओपॅथिक मेडिकल कॉलेज, कोल्हापूर यांनी “क्लासिकल होमिओपॅथिक प्रॅक्टिसमध्ये आधुनिक निदान उपकरणांचा वापर” या विषयावर मार्गदर्शन केले.

डॉ. नरेंद्र पाटील, गडहिंग्लज यांनी “होमिओपॅथीतील गंभीर व गुंतागुंतीच्या रुग्णांचे व्यवस्थापन” या विषयावर आपले अनुभव मांडले.

तर प्रा. डॉ. किरण एन. पाटील, प्राचार्य, ए. एम. शेख होमिओपॅथिक मेडिकल कॉलेज, बेळगाव यांनी “होमिओपॅथिक वैद्यकीय व्यवसायातील नैतिकता” या विषयावर व्याख्यान देत वैद्यकीय क्षेत्रातील नैतिक मूल्ये, जबाबदाऱ्या व कायदेशीर जाणीव यांचे महत्त्व अधोरेखित केले.

उपस्थित डॉक्टर, प्राध्यापक, विद्यार्थी व इंटर्न यांनी वैज्ञानिक सत्रांमध्ये उत्स्फूर्त सहभाग नोंदविला. कार्यक्रमाचा समारोप डॉ. संतोष मगदूम यांनी आभार प्रदर्शनाने केला.

यावेळी नव्या पदाधिकाऱ्यांनी बेळगाव जिल्ह्यातील होमिओपॅथी क्षेत्र अधिक सक्षम करण्यासाठी शैक्षणिक, सामाजिक व व्यावसायिक उपक्रम राबविण्याचा संकल्प व्यक्त केला.