Belgaum Varta Belgaum Varta
बेळगाव : दोन महिन्यांच्या उन्हाळी सुट्टीनंतर विद्यार्थ्यांच्या आनंदाला पुन्हा उधाण आले असून सोमवार, १ जूनपासून शैक्षणिक वर्ष २०२६-२७ ला प्रारंभ होत आहे. नव्या आशा, नव्या आकांक्षा आणि उज्ज्वल भवितव्याची स्वप्ने उराशी बाळगून विद्यार्थी पुन्हा एकदा शाळेच्या प्रांगणात दाखल होणार आहेत. त्यामुळे शहरासह ग्रामीण भागातील शाळांमध्ये उत्साहाचे वातावरण निर्माण झाले आहे.
“शिक्षण ही यशाची गुरुकिल्ली असून ज्ञानाचे दरवाजे विद्यार्थ्यांसाठी सदैव खुले आहेत,” हा संदेश देत शालेय शिक्षण विभागाने राज्यभरात शाळा प्रारंभोत्सव साजरा करण्याचे निर्देश दिले आहेत. त्यानुसार विविध शाळांमध्ये विद्यार्थ्यांच्या स्वागतासाठी विशेष तयारी करण्यात आली आहे.
शाळांच्या प्रवेशद्वारांना आकर्षक फुगे, रंगीबेरंगी सजावट, स्वागत फलक तसेच लहान मुलांना आवडणाऱ्या कार्टून पात्रांच्या प्रतिकृतींनी सजविण्यात आले आहे. वर्गखोल्यांमध्ये शैक्षणिक साहित्याची मांडणी, भित्तीपत्रके आणि विविध उपक्रमांची तयारी पूर्ण करण्यात आली असून विद्यार्थ्यांचे आनंददायी वातावरणात स्वागत करण्यासाठी शिक्षकवर्ग सज्ज झाला आहे.
विशेषतः पहिलीतील आणि नव्याने प्रवेश घेणाऱ्या विद्यार्थ्यांचा शाळेतील पहिला दिवस संस्मरणीय ठरावा यासाठी विविध सांस्कृतिक, क्रीडा व मनोरंजनात्मक उपक्रमांचे आयोजन करण्यात आले आहे. पहिल्याच दिवशी विद्यार्थ्यांना मोफत पाठ्यपुस्तके व गणवेशांचे वितरण करण्यात येणार असून शाळेची गोडी निर्माण करण्यासाठी विशेष प्रयत्न केले जात आहेत.
मागील शैक्षणिक वर्षातील परीक्षा मार्चअखेरीस संपल्यानंतर विद्यार्थी दोन महिन्यांच्या सुट्टीचा आनंद घेत होते. आता नव्या जोमाने आणि उत्साहाने ते पुन्हा शिक्षणाच्या प्रवाहात सहभागी होणार आहेत. शाळांच्या घंटांसोबतच पालकांचीही धावपळ सुरू होणार असून शालेय बस, रिक्षा, ट्युशन क्लासेस आणि इतर शैक्षणिक उपक्रमांनाही वेग येणार आहे.
नवीन शैक्षणिक वर्षाचा प्रारंभ हा विद्यार्थी, पालक, शिक्षक आणि शिक्षण व्यवस्थेशी संबंधित सर्व घटकांसाठी उत्साहाचा आणि नव्या संधींचा पर्व ठरणार असल्याचे चित्र सर्वत्र दिसून येत आहे.
