बालिका आदर्श विद्यालयात जागतिक पर्यावरण दिनानिमित्त वृक्षारोपण

बेळगाव : टिळकवाडी येथील बालिका आदर्श विद्यालयाच्या एनसीसी विभागाच्या वतीने जागतिक पर्यावरण दिन उत्साहात साजरा करण्यात आला. यानिमित्त आयोजित वृक्षारोपण उपक्रमातून पर्यावरण संवर्धनाचा संदेश देण्यात आला.

कार्यक्रमात शाळा परिसरासह सार्वजनिक ठिकाणी विविध प्रकारच्या वृक्षांची लागवड करण्यात आली. शिक्षक, विद्यार्थी, कर्मचारी आणि पालकांनी मोठ्या उत्साहाने सहभाग नोंदवत पर्यावरण रक्षणासाठी आपले योगदान दिले.

कार्यक्रमाच्या प्रारंभी पर्यावरण संरक्षणाचे महत्त्व अधोरेखित करण्यात आले. वाढते प्रदूषण, हवामानातील बदल आणि कमी होत चाललेले हरित क्षेत्र यामुळे वृक्षारोपणाची आवश्यकता अधिक वाढली असल्याचे मत मुख्याध्यापकांनी व्यक्त केले.

उपस्थित मान्यवरांच्या हस्ते वृक्षारोपण करण्यात आले. यावेळी केवळ झाडे लावणेच नव्हे, तर त्यांचे संगोपन आणि संवर्धन करणे ही प्रत्येकाची सामूहिक जबाबदारी असल्याचेही सांगण्यात आले.

या उपक्रमामुळे विद्यार्थ्यांमध्ये पर्यावरणाबाबत जागरूकता निर्माण झाली असून भविष्यातही अशा उपक्रमांचे आयोजन करण्यात येणार असल्याची माहिती आयोजकांनी दिली. “एक झाड लावा, पर्यावरण वाचवा” हा संदेश देत कार्यक्रमाचा समारोप करण्यात आला.