‘प्यास’कडून तारिहाळ येथील ऐतिहासिक विहिरीचा जीर्णोद्धार सुरू

बेळगाव : तारिहाळ येथील ऐतिहासिक बडेकोळ्ळ मठ परिसरातील शतकाहून अधिक जुनी विहीर पुनरुज्जीवित करण्याचे काम प्यास फाऊंडेशनने हाती घेतले आहे. आगामी सोमवती अमावस्येपूर्वी विहीर कार्यान्वित करण्याच्या उद्देशाने हे काम युद्धपातळीवर सुरू करण्यात आले आहे.

बडेकोळ्ळ मठ (बडेखोलमठ नागय्या स्वामी मठ) हे उत्तर कर्नाटकातील प्रमुख धार्मिक स्थळांपैकी एक असून दर अमावस्येला हजारो भाविक येथे दर्शनासाठी येतात. मात्र, गेल्या काही वर्षांत विहिरीत मोठ्या प्रमाणात गाळ साचल्याने आणि परिसरात झाडे-झुडपे वाढल्याने तिची पाणी साठवण्याची क्षमता कमी झाली होती. परिणामी भाविकांना पिण्याच्या पाण्याची टंचाई जाणवत होती.

मठ प्रशासनाच्या आवाहनाला प्रतिसाद देत प्यास फाऊंडेशनच्या स्वयंसेवकांनी विहीर स्वच्छता, गाळ उपसा, झाडे-झुडपे हटविणे तसेच आवश्यक दुरुस्तीची कामे सुरू केली आहेत. भाविकांना सुरक्षित आणि स्वच्छ पाणी उपलब्ध व्हावे यासाठी विशेष उपाययोजनाही केल्या जात आहेत.

प्यास फाऊंडेशनने पारंपरिक जलस्रोतांचे संवर्धन आणि जलवारशाचे जतन करण्याच्या आपल्या बांधिलकीचा पुनरुच्चार केला आहे. जीर्णोद्धार पूर्ण झाल्यानंतर ही विहीर मठाला भेट देणाऱ्या हजारो भाविकांसाठी पिण्याच्या पाण्याचा विश्वासार्ह स्रोत ठरणार असून ऐतिहासिक धार्मिक स्थळाच्या जतनासाठीही महत्त्वपूर्ण योगदान देणार आहे.