Belgaum Varta Belgaum Varta
बेळगाव : बेळगाव उत्तर मतदारसंघात सुरू असलेल्या भूमिगत गटार (यूजीडी) आणि 24×7 पाणीपुरवठा प्रकल्पांच्या कामांना गती देण्याच्या दृष्टीने आमदार आसिफ सेठ यांनी एल अँड टी कंपनीचे अधिकारी आणि महानगरपालिका प्रशासनासोबत महत्त्वपूर्ण आढावा बैठक घेतली. प्रलंबित विकासकामे तातडीने पूर्ण करण्याबरोबरच कामांच्या गुणवत्तेत कोणतीही तडजोड होऊ नये, असे स्पष्ट निर्देश त्यांनी यावेळी दिले.
बैठकीत सुरू असलेल्या प्रकल्पांची सद्यस्थिती, कामांची प्रगती, उर्वरित टप्पे तसेच प्रकल्प पूर्णत्वासाठी लागणारा कालावधी याबाबत सविस्तर चर्चा करण्यात आली. पाईपलाईन आणि भूमिगत गटार बसविण्यासाठी खोदण्यात आलेल्या रस्त्यांची त्वरित व दर्जेदार दुरुस्ती करण्यात यावी, तसेच प्रकल्पाच्या अंमलबजावणीदरम्यान सर्व तांत्रिक व गुणवत्ता मानकांचे काटेकोर पालन करण्यात यावे, अशा सूचना आमदार सेठ यांनी अधिकाऱ्यांना दिल्या.
यावेळी युवा नेते अमन सेठ हे देखील उपस्थित होते. मतदारसंघातील महत्त्वाच्या पायाभूत सुविधा प्रकल्पांचा सातत्याने पाठपुरावा करत असलेल्या आमदार सेठ यांनी नागरिकांना भेडसावणाऱ्या समस्या आणि विकासकामांमुळे निर्माण होणाऱ्या अडचणींचाही आढावा घेतला.
पावसाळ्याच्या पार्श्वभूमीवर सुरू असलेल्या कामांमुळे वाहतूक कोंडी, रस्त्यांवर पाणी साचणे अथवा नागरिकांच्या दैनंदिन जीवनात अडथळे निर्माण होणार नाहीत, यासाठी संबंधित यंत्रणांनी प्रभावी उपाययोजना कराव्यात, असे त्यांनी ठामपणे सांगितले. तसेच नागरिकांना कमीत कमी त्रास होईल याची दक्षता घेत प्रलंबित कामे जलदगतीने पूर्ण करण्याचे आदेशही त्यांनी दिले.
“बेळगाव उत्तरमधील नागरिकांना दर्जेदार नागरी सुविधा उपलब्ध करून देणे हे आमचे सर्वोच्च प्राधान्य आहे. पावसाळ्यापूर्वी प्रलंबित कामांना गती देऊन नागरिकांची गैरसोय टाळण्यासाठी प्रशासनाने युद्धपातळीवर काम करावे,” असे आमदार आसिफ सेठ यांनी यावेळी सांगितले.
बेळगाव उत्तरमधील नागरी पायाभूत सुविधा अधिक सक्षम करणे, नागरिकांचे जीवनमान उंचावणे आणि विकासकामांमुळे होणारा त्रास कमी करणे या उद्देशाने ही बैठक आयोजित करण्यात आल्याचे त्यांनी स्पष्ट केले. नागरिकांच्या सेवेसाठी आपण कायम कटिबद्ध आणि तत्पर असल्याचा पुनरुच्चारही त्यांनी यावेळी केला.
