व्हॅक्सिन डेपो, डीएचओ कार्यालयाजवळ उघड्यावर वैद्यकीय कचरा

बेळगाव : टिळकवाडी येथील व्हॅक्सिन डेपो परिसरात आणि जिल्हा आरोग्य अधिकारी (डीएचओ) कार्यालयाच्या शेजारील झुडपांमध्ये वैद्यकीय कचऱ्याची पाकिटे उघड्यावर टाकण्यात आल्याचे निदर्शनास आल्याने सामाजिक कार्यकर्ते संतोष आर. दरेकर यांनी याबाबत तीव्र चिंता व्यक्त केली आहे. त्यांनी डीएचओ कार्यालय आणि बेळगाव महानगरपालिकेला तातडीने हा कचरा हटवून परिसर स्वच्छ करण्याचे आवाहन केले आहे.

दरेकर यांनी प्रसिद्धीस दिलेल्या निवेदनात म्हटले आहे की, व्हॅक्सिन डेपो परिसराला भेट दिली असता डीएचओ कार्यालयाच्या शेजारील झुडपांमध्ये वैद्यकीय कचऱ्याची पाकिटे पडलेली आढळली. याचे छायाचित्र आणि व्हिडिओ पुरावेही उपलब्ध असल्याचा दावा त्यांनी केला आहे.

सदर परिसरात दररोज सकाळी फिरण्यासाठी येणारे नागरिक, ज्येष्ठ नागरिक, क्रीडाप्रेमी आणि लहान मुले मोठ्या संख्येने येत असतात. पावसाळ्याच्या पार्श्वभूमीवर पावसाच्या पाण्याबरोबर हा कचरा रस्त्यावर किंवा सार्वजनिक ठिकाणी वाहून जाण्याची शक्यता असून त्यामुळे आरोग्यविषयक धोके निर्माण होऊ शकतात, असे त्यांनी नमूद केले.

विशेषतः चप्पल किंवा सँडल घालून फिरणाऱ्या नागरिकांच्या संपर्कात दूषित कचरा आल्यास संसर्गाचा धोका निर्माण होऊ शकतो. तसेच लहान मुलांनी उत्सुकतेपोटी अशा पाकिटांना हात लावल्यास किंवा ती उघडल्यास गंभीर परिणाम होऊ शकतात, अशी भीतीही त्यांनी व्यक्त केली.

वैद्यकीय कचऱ्याची योग्य पद्धतीने विल्हेवाट लावण्यासाठी तो अधिकृत बायोमेडिकल वेस्ट संकलन संस्थांकडे किंवा महानगरपालिकेच्या कचरा व्यवस्थापन यंत्रणेकडे सुपूर्द करण्याची व्यवस्था करण्यात यावी, अशी मागणी त्यांनी केली आहे.

याशिवाय कार्यालय परिसरातील झुडपांमध्ये प्लास्टिकच्या बाटल्या आणि इतर कचऱाही विखुरलेल्या अवस्थेत आढळल्याचे त्यांनी सांगितले. स्वच्छ आणि निरोगी वातावरणाच्या अपेक्षेने येणाऱ्या नागरिकांनाच परिसरातील कचरा साफ करण्याची वेळ येत असल्याची खंत त्यांनी व्यक्त केली.

महानगरपालिका नागरिकांकडून कचरा टाकल्यास दंडात्मक कारवाई करते, तर सरकारी कार्यालयांनीही स्वच्छता आणि कचरा व्यवस्थापनाच्या नियमांचे काटेकोर पालन करणे आवश्यक असल्याचे दरेकर यांनी म्हटले आहे.

संबंधित अधिकाऱ्यांनी तातडीने कारवाई करून परिसरातील वैद्यकीय व इतर कचरा हटवावा तसेच भविष्यात अशा घटना घडणार नाहीत यासाठी योग्य उपाययोजना कराव्यात, अशी मागणी त्यांनी केली आहे. सार्वजनिक आरोग्य आणि पर्यावरण स्वच्छता ही सर्वांची सामूहिक जबाबदारी असून सरकारी संस्थांनी याबाबत आदर्श निर्माण करावा, असेही त्यांनी स्पष्ट केले.