बेळगावातील शासकीय वसतिगृहात मध्यरात्री विद्यार्थ्यांचे आंदोलन; जेवणात अळ्या, पाणीटंचाईवर संताप

बेळगाव : संगमेश्वर नगर येथील मुलांच्या शासकीय वसतिगृहात मूलभूत सुविधांच्या अभावामुळे विद्यार्थ्यांनी गुरुवारी मध्यरात्री तीव्र आंदोलन छेडले. जेवणात वारंवार अळ्या आढळणे, पिण्याच्या पाण्याची तीव्र टंचाई आणि वॉर्डनच्या कथित दुर्लक्षामुळे विद्यार्थ्यांमध्ये संतापाचे वातावरण निर्माण झाले.

विद्यार्थ्यांच्या म्हणण्यानुसार, वॉर्डन वसतिगृहात आले असताना जेवणाच्या ताटात अळ्या आढळल्याने विद्यार्थ्यांनी संतप्त प्रतिक्रिया व्यक्त केली. निषेध म्हणून त्यांनी जेवणावर बहिष्कार टाकत स्वयंपाकाची भांडी बाहेर ठेवली आणि समाजकल्याण विभागाचे तालुका अधिकारी तसेच सहसंचालक यांनी तातडीने घटनास्थळी भेट द्यावी, अशी मागणी केली.

विद्यार्थी प्रतिनिधी राजेश लमाणी यांनी वॉर्डनच्या सातत्याने होणाऱ्या गैरहजेरीमुळे आणि दुर्लक्षामुळे विद्यार्थ्यांचे हाल होत असून त्यांच्या आरोग्याशी खेळ सुरू असल्याचा आरोप केला.

घटनेची माहिती मिळताच एपीएमसी पोलीस ठाण्याचे अधिकारी वसतिगृहात दाखल झाले. त्यांनी विद्यार्थ्यांशी चर्चा करून परिस्थिती शांत करण्याचा प्रयत्न केला तसेच वरिष्ठ अधिकाऱ्यांसोबत बैठक घेऊन समस्या लवकरात लवकर सोडविण्याचे आश्वासन दिले.

दरम्यान, विद्यार्थ्यांची प्रकृती बिघडू नये म्हणून खबरदारीचा उपाय म्हणून रुग्णवाहिकाही घटनास्थळी बोलावण्यात आली होती, अशी माहिती शिवय्या मठपती यांनी दिली. या घटनेमुळे शासकीय वसतिगृहांतील सुविधांच्या गुणवत्तेबाबत पुन्हा एकदा प्रश्नचिन्ह उपस्थित झाले आहे.