वाहतूक नियमांचे उल्लंघन केलेल्या नंबर प्लेटविरोधात विशेष मोहीम; १०५ दुचाकींवर शहर वाहतूक पोलिसांची कारवाई

बेळगाव : बेळगाव शहर वाहतूक पोलिसांनी नंबर प्लेट नसलेल्या, नंबर लपवून ठेवलेल्या तसेच चुकीची किंवा सदोष नोंदणी क्रमांक प्लेट लावलेल्या दुचाकीस्वारांविरोधात विशेष मोहीम सुरू केली आहे.

या मोहिमेदरम्यान वाहतूक पोलिसांनी नियमांचे उल्लंघन करणाऱ्या १०५ दुचाकी अडवून त्यांची तपासणी केली. काही वाहनांवर नंबर प्लेट नसल्याचे, तर काही वाहनांवर नोंदणी क्रमांक लपविलेला असल्याचे आढळून आले. तसेच काही दुचाकींवर पुढील किंवा मागील बाजूस नंबर प्लेट नसल्याचे निदर्शनास आले.

पोलिसांनी संबंधित वाहनांची कागदपत्रे व नोंदणीची माहिती तपासली. नियमभंग झालेल्या वाहनांवर नियमानुसार दंडात्मक कारवाई करण्यात आली. तसेच वाहनचालकांना नोंदणी क्रमांक स्पष्टपणे दिसेल अशा पद्धतीने नंबर प्लेट लावण्याच्या सूचना देऊनच पुढे जाण्याची परवानगी देण्यात आली.

बेळगाव शहर हद्दीत सदोष, लपविलेल्या किंवा नंबर प्लेट नसलेल्या वाहनांविरोधात मोटार वाहन कायद्यानुसार यापुढेही कठोर कारवाई सुरूच राहणार असल्याचे वाहतूक पोलिसांनी स्पष्ट केले आहे. वाहनमालक आणि दुचाकीस्वारांनी वाहतूक नियमांचे पालन करून वाहनांची नोंदणी क्रमांक प्लेट नेहमी योग्य आणि स्पष्टपणे प्रदर्शित करावी, असे आवाहन पोलिसांनी केले आहे.