कांगोतील सोन्याच्या खाणीत सतीश जारकीहोळींची गुंतवणूक?

 

ईडीच्या तपासात परदेशी कंपन्यांतील शेअर्ससह कोट्यवधींची रोकड जप्त

बेळगाव : कर्नाटकचे सार्वजनिक बांधकाम मंत्री सतीश जारकीहोळी, त्यांच्या कुटुंबीयांशी संबंधित व्यक्ती आणि काही निकटवर्तीयांच्या ठिकाणी केलेल्या झडतीनंतर अंमलबजावणी संचालनालयाने (ईडी) तपासासंदर्भात महत्त्वाची माहिती जाहीर केली आहे. ईडीच्या म्हणण्यानुसार, या तपासात आफ्रिकेतील कांगो आणि झांबिया येथील काही खाण कंपन्यांमधील कथित गुंतवणुकीचे धागेदोरे समोर आले आहेत.

९ आणि १० सप्टेंबर रोजी ईडीच्या बंगळुरू विभागाने बंगळुरू, बेळगाव, गोकाक आणि कोलकाता येथील एकूण २१ ठिकाणी झडती घेतल्याचे सांगण्यात आले आहे. यामध्ये जारकीहोळी यांचे गोकाक येथील निवासस्थान, बंगळुरूमधील डॉलर्स कॉलनी आणि क्रेसेंट रोडवरील कार्यालय-निवासाचा समावेश आहे. त्याचबरोबर खासदार प्रियांका जारकीहोळी, राहुल जारकीहोळी तसेच वाय.डी. मंजुनाथ आणि इतर संबंधित व्यक्तींच्या ठिकाणीही तपास करण्यात आला.

ईडीच्या माहितीनुसार, ‘भारत वाणिज्य ईस्टर्न प्रायव्हेट लिमिटेड’ या कंपनीमार्फत सार्वजनिक बांधकाम विभागातील मोठ्या कंत्राटांसाठी कथित लाच देण्यात आल्याचा संशय तपास यंत्रणेला आहे. या कथित गैरव्यवहारातून मिळालेला पैसा परदेशातील मालमत्ता व व्यवसायांमध्ये गुंतवण्यात आल्याचा आरोप तपासात करण्यात आला आहे.

कांगो आणि झांबियातील कंपन्यांमध्ये गुंतवणुकीचा दावा

ईडीच्या म्हणण्यानुसार, महादेवी मंजुनाथ यांच्या नावावर कांगोमधील ‘एल्डोराडो मायनिंग रिसोर्सेस’ आणि झांबियातील ‘नव ऑरम मायनिंग लिमिटेड’ यांसारख्या कंपन्यांमध्ये शेअर्स असल्याचे तपासात आढळले आहे. तसेच कांगोतील ‘मॅग्निट्यूड स्टार एसएआरएल’ या कंपनीत सतीश जारकीहोळी यांचा सुमारे ४० टक्के हिस्सा असल्याचा दावा ईडीने केल्याचे वृत्त आहे.

या परदेशी खाण व्यवसायाशी संबंधित कागदपत्रे तपास यंत्रणेने ताब्यात घेतल्याचे सांगण्यात आले आहे.

साडेतीन कोटींची रोकड, परकीय चलन जप्त

झडतीदरम्यान सुमारे ३.५ कोटी रुपयांपेक्षा अधिक बेहिशेबी रोकड तसेच अमेरिकन डॉलर आणि युरो यांसह सुमारे १५ लाख रुपये किमतीचे परकीय चलन जप्त केल्याचा दावा करण्यात आला आहे.

परदेशातील कंपनीत कथितरित्या अनधिकृत मार्गाने मोठ्या प्रमाणात पैसा गुंतवल्याचे पुरावे मिळाल्याचेही ईडीने म्हटले आहे. या प्रकरणाचा तपास FEMA तसेच आर्थिक गैरव्यवहाराच्या संशयाच्या अनुषंगाने सुरू असल्याचे सांगण्यात आले आहे.

दरम्यान, ईडीच्या तपासातील आरोप अद्याप न्यायालयीनरीत्या सिद्ध झालेले नाहीत. पुढील तपासानंतर या प्रकरणातील आर्थिक व्यवहार आणि संबंधित व्यक्तींची भूमिका स्पष्ट होण्याची शक्यता आहे.