Belgaum Varta Belgaum Varta
१७ सप्टेंबर ते १७ ऑक्टोबरदरम्यान आरोग्य, पर्यावरण, क्रीडा, सेवा व जनजागृतीपर कार्यक्रमांचे आयोजन
बेळगाव : माननीय पंतप्रधान नरेंद्र मोदी यांच्या २५ वर्षांच्या सार्वजनिक सेवाकाळाचे औचित्य साधून भारतीय जनता पक्षाच्या वतीने १७ सप्टेंबर ते १७ ऑक्टोबर या कालावधीत विविध सामाजिक, सेवाभावी, पर्यावरणपूरक, क्रीडा व जनजागृतीपर उपक्रमांचे आयोजन करण्यात आले आहे.
या पार्श्वभूमीवर भारतीय जनता पक्षाचे नेते किरण जाधव यांनी भाजप उत्तर मंडळाचे माजी कार्याध्यक्ष, पदाधिकारी व प्रमुख कार्यकर्त्यांची बैठक घेऊन महिनाभर राबविण्यात येणाऱ्या विविध कार्यक्रमांबाबत सविस्तर चर्चा केली. यावेळी सर्व पदाधिकारी व कार्यकर्त्यांनी उत्स्फूर्त सहभाग घेण्याचा निर्धार व्यक्त केला.
१७ सप्टेंबर रोजी पंतप्रधान नरेंद्र मोदी यांच्या वाढदिवसानिमित्त गणपती मंदिरात पूजा-अर्चा व गोपूजन करण्यात येणार आहे. त्यानंतर बेळगाव येथील BIMS हॉस्पिटलच्या प्रसूती विभागात भेट देऊन महिलांना फळांचे वाटप करण्यात येणार आहे.
याशिवाय महिनाभरात आरोग्य तपासणी शिबिर, रक्तदान शिबिर, वृक्षारोपण, पर्यावरण जनजागृती, गोपूजन, अनाथ मुलांसोबत भोजन, गणेश विसर्जन मिरवणुकीत सहभाग तसेच विविध सामाजिक उपक्रम राबविण्यात येणार आहेत.
पंतप्रधान नरेंद्र मोदी यांच्या नेतृत्वाखाली केंद्र सरकारने राबविलेल्या विविध जनकल्याणकारी योजनांची माहिती नागरिकांपर्यंत पोहोचविण्यासाठी घरोघरी संपर्क व योजनांचा प्रचार-प्रसार करण्यात येणार आहे. तसेच पर्यावरण संवर्धनाचा संदेश देण्यासाठी नागरिकांना पर्यावरणपूरक उपक्रमांची माहिती देण्यात येणार आहे. महात्मा गांधी जयंतीनिमित्तही विशेष सेवा व स्वच्छता उपक्रम आयोजित केले जाणार आहेत.
शालेय विद्यार्थ्यांमध्ये क्रीडा संस्कृती वाढीस लागावी आणि त्यांच्यातील शारीरिक क्षमता व संघभावना विकसित व्हावी, यासाठी इयत्ता ५वी ते १०वीच्या विद्यार्थ्यांसाठी खो-खो, कबड्डी व व्हॉलीबॉल स्पर्धांचे आयोजन करण्यात येणार आहे.
या बैठकीत उपस्थित पदाधिकारी व कार्यकर्त्यांनी विविध उपक्रमांबाबत आपली मते व सूचना मांडल्या. तसेच १७ सप्टेंबरपासून सुरू होणाऱ्या महिनाभराच्या सेवा उपक्रमात सक्रियपणे सहभागी होण्याची ग्वाही दिली.
समाजातील सर्व घटकांना सोबत घेऊन सेवा, सामाजिक बांधिलकी, पर्यावरण संवर्धन, आरोग्य आणि जनजागृतीच्या माध्यमातून हा उपक्रम व्यापक स्वरूपात राबविण्याचा संकल्प यावेळी करण्यात आला.
