Sunday , November 22 2026
Breaking News

आठ दिवसांतून एकदाच पाणीपुरवठा!

Spread the love

 

दोन्ही प्रमुख जलाशय भरूनही नागरिकांची पाण्यासाठी वणवण; २४ तास पाणीपुरवठा योजनेवर प्रश्नचिन्ह

बेळगाव : शहरातील विविध भागांत गेल्या आठ दिवसांपासून एकदाच पाणीपुरवठा होत असल्याने नागरिकांमध्ये तीव्र नाराजी व्यक्त होत आहे. विशेष म्हणजे शहराला पाणीपुरवठा करणारे दोन्ही प्रमुख जलाशय मुबलक पाणीसाठ्याने भरलेले असतानाही नागरिकांना नियमित पाणी मिळत नसल्याने प्रशासनाच्या नियोजनावर प्रश्नचिन्ह उपस्थित झाले आहे.

यंदा पावसाचे प्रमाण समाधानकारक राहिल्याने जलाशयांमध्ये पुरेसा पाणीसाठा उपलब्ध आहे. असे असतानाही शहरातील अनेक भागांत आठ दिवसांनी पाणी येत असल्याने नागरिकांना पाण्याचा साठा करून ठेवण्याची वेळ आली आहे. पाणीपुरवठा अनियमित आणि दीर्घ अंतराने होत असल्याने दैनंदिन गरजा भागविताना नागरिकांची मोठी गैरसोय होत आहे.

शहरातील पाणीपुरवठा सुरळीत करण्यासाठी २४ तास पाणीपुरवठा योजनेचे काम सुरू आहे. विविध भागांत जलवाहिन्या टाकणे, आवश्यक पायाभूत सुविधा उभारणे आणि वितरण व्यवस्थेत सुधारणा करण्याची कामे सुरू असल्याचे प्रशासनाकडून सांगितले जाते. मात्र, प्रत्यक्षात नागरिकांना नियमित आणि पुरेशा प्रमाणात पाणी मिळत नसल्याने या योजनेच्या कार्यक्षमतेबाबत प्रश्न उपस्थित होत आहेत.

जलाशय भरले, मग पाणीपुरवठा का विस्कळीत?

जलाशयांमध्ये पुरेसा पाणीसाठा असतानाही शहरातील पाणीपुरवठ्याचे अंतर कमी होत नसल्याने नागरिकांकडून संताप व्यक्त होत आहे. पाणी उपलब्ध असताना वितरण व्यवस्थेतील अडथळ्यांमुळे नागरिकांना पाण्यासाठी प्रतीक्षा करावी लागत असेल, तर त्याची जबाबदारी नेमकी कोणाची? असा सवालही उपस्थित केला जात आहे.

२४ तास पाणीपुरवठा योजना पूर्णत्वास येण्यापूर्वी सध्याची वितरण व्यवस्था अधिक सक्षम करून नागरिकांना नियमित पाणी उपलब्ध करून द्यावे, अशी मागणी जोर धरत आहे. जलाशय भरलेले असताना नळ कोरडे राहणे ही पाणीटंचाई नसून नियोजन आणि वितरण व्यवस्थेचे अपयश आहे, अशी संतप्त प्रतिक्रिया नागरिकांतून व्यक्त होत आहे.

About Belgaum Varta

Check Also

ज्योती सेंट्रलचा फुटबॉलपटू ध्यानेश राज्यात अव्वल

Spread the love    बेळगाव : दक्षिण महाराष्ट्र शिक्षण मंडळ संचलित ज्योती सेंट्रल स्कूल, कॅम्प, …

Leave a Reply

Your email address will not be published. Required fields are marked *