बेळगावात माजी सैनिकांचा मेळावा; ७२८ रोजगाराच्या संधी उपलब्ध

 

बेळगाव : द मराठा लाईट इन्फंट्री रेजिमेंटल सेंटर आणि रेकॉर्ड्स, द मराठा लाईट इन्फंट्री यांच्या वतीने, मुख्यालय दक्षिण भारत क्षेत्र तसेच कर्नाटक व केरळ सब एरियाच्या मार्गदर्शनाखाली तिन्ही संरक्षण दलांच्या माजी सैनिकांचा मेळावा आणि रोजगार मेळावा शिवाजी स्टेडियम येथे आयोजित करण्यात आला होता.

कर्नाटक व केरळ सब एरियाचे जनरल ऑफिसर कमांडिंग मेजर जनरल भरत मेहतानी हे प्रमुख पाहुणे म्हणून उपस्थित होते. द मराठा लाईट इन्फंट्री रेजिमेंटल सेंटरचे कमांडंट ब्रिगेडियर गिरीश उपाध्याय, ओआयसी रेकॉर्ड्स तसेच स्टेशन कमांडर यांच्या नेतृत्वाखाली या मेळाव्याचे आयोजन करण्यात आले. यावेळी जिल्हा विधी सेवा प्राधिकरण, बेलगावीचे सदस्य सचिव व वरिष्ठ दिवाणी न्यायाधीश के. एन. शिवकुमार आणि एअरमेन ट्रेनिंग स्कूल, सांबरा येथील कमांडंट एअर कमोडोर सूरज शंकर यांचीही उपस्थिती होती.

या मेळाव्यात सुमारे ५,२३० माजी सैनिक, वीर नारी आणि त्यांच्या कुटुंबीयांनी सहभाग घेतला.

यावेळी उल्लेखनीय सेवा बजावलेल्या दोन ज्येष्ठ माजी सैनिकांचा विशेष सन्मान करण्यात आला. द मद्रास रेजिमेंटचे माजी सैनिक सुभेदार शांतय्या यांनी १७ वर्षांहून अधिक काळ लष्करी सेवा बजावली असून, १९६५ आणि १९७१ च्या भारत-पाक संघर्षांत सक्रिय सहभाग घेतला होता. त्यांच्या शौर्यपूर्ण सेवेसाठी त्यांना सेना मेडल प्रदान करण्यात आले होते. १९७२ मध्ये तत्कालीन लष्करप्रमुख जनरल सॅम माणेकशॉ यांनी त्यांचा वैयक्तिकरित्या सन्मान केला होता.

तसेच द मराठा लाईट इन्फंट्रीचे माजी जवान दत्तू पाटील (वय १०३ वर्षे) यांनी १९४३ ते १९४६ या कालावधीत दुसऱ्या महायुद्धाच्या काळात सेवा बजावली. त्यांच्या सेवेसाठी त्यांना १९३९–४५ स्टार, बर्मा स्टार आणि वॉर मेडल प्रदान करण्यात आले. त्यांचा लष्करी वारसा चार पिढ्यांपासून कायम असून, त्यांचे पुत्र १९ मराठा रेजिमेंटमध्ये, तर नातू आणि पणतू कॉर्प्स ऑफ सिग्नल्समध्ये सेवेत आहेत. दोन्ही ज्येष्ठ माजी सैनिकांचा राष्ट्रासाठीच्या योगदानाबद्दल गौरव करण्यात आला.

मेळाव्यात २१ रेकॉर्ड्स कार्यालयांसह विविध संबंधित विभागांचे प्रतिनिधी सहभागी झाले होते. त्यांनी पेन्शन, आवश्यक कागदपत्रे, आधार व पॅन, बँकिंग तसेच विविध कल्याणकारी योजनांबाबत मार्गदर्शन करून माजी सैनिकांना आवश्यक सुविधा उपलब्ध करून दिल्या.

यावेळी मेजर जनरल भरत मेहतानी यांनी माजी सैनिकांच्या कल्याणासाठी सुरू असलेल्या विविध उपक्रमांचे कौतुक केले.

दरम्यान, आयोजित रोजगार मेळाव्यात २४ कंपन्यांनी सहभाग घेतला असून ७२८ रोजगाराच्या संधी उपलब्ध करून देण्यात आल्या.