Belgaum Varta Belgaum Varta
बेळगाव : के.एल.ई. संस्थेच्या लिंगराज महाविद्यालय, बेळगाव (स्वायत्त) येथील राष्ट्रीय सेवा योजना विभागाला शैक्षणिक वर्ष २०२५–२६ साठी कित्तूर राणी चन्नम्मा विद्यापीठ, बेळगावी यांच्याकडून ‘सर्वोत्कृष्ट राष्ट्रीय सेवा योजना विभाग’ पुरस्कार प्रदान करण्यात आला. दिनांक २४ ऑक्टोबर २०२६ रोजी आयोजित राष्ट्रीय सेवा योजना पुरस्कार वितरण समारंभात हा पुरस्कार प्रदान करण्यात आला.
या कार्यक्रमाच्या अध्यक्षस्थानी विद्यापीठाचे कुलगुरू प्रा. सी. एम. त्यागराज होते. भारत सरकारच्या राष्ट्रीय सेवा योजना प्रादेशिक केंद्र, बेंगळुरूचे प्रादेशिक संचालक श्री. गिरिधर उपाध्याय यांच्या हस्ते कार्यक्रमाचे उद्घाटन करण्यात आले.
कार्यक्रमाला प्रमुख पाहुणे म्हणून युवा सक्षमीकरण व क्रीडा विभाग, राष्ट्रीय सेवा योजना कक्ष, बेंगळुरू येथील राज्य राष्ट्रीय सेवा योजना अधिकारी डॉ. प्रताप लिंगय्या उपस्थित होते. विशेष निमंत्रित म्हणून इंदिरा गांधी राष्ट्रीय पुरस्कारप्राप्त प्रा. रवी आकुला, अधिष्ठाता, वाणिज्य विद्याशाखा, महात्मा गांधी विद्यापीठ, नलगोंडा, तेलंगणा उपस्थित होते.
यावेळी के.ए.एस. अधिकारी श्री. संतोष कामगौडा, कुलसचिव, कित्तूर राणी चन्नम्मा विद्यापीठ, बेळगावी, तसेच प्रा. डी. एन. पाटील आणि प्रा. बी. एस. नवी हे सन्माननीय अतिथी म्हणून उपस्थित होते.
लिंगराज महाविद्यालयाच्या राष्ट्रीय सेवा योजना विभागाचे समन्वयक डॉ. शशिकांत कोन्नूर यांच्या समन्वयातून आणि महाविद्यालयाचे प्राचार्य डॉ. एच. एस. मेलीनमनी यांच्या मार्गदर्शनाखाली विभागाने विविध सामाजिक उपक्रम आणि समाजसेवेच्या क्षेत्रात उल्लेखनीय कार्य केले आहे. या कार्याची दखल घेऊन महाविद्यालयाच्या राष्ट्रीय सेवा योजना विभागाला हा प्रतिष्ठित पुरस्कार प्रदान करण्यात आला.
या पुरस्कारामुळे लिंगराज महाविद्यालयाच्या शिरपेचात मानाचा तुरा रोवला गेला असून महाविद्यालयाच्या राष्ट्रीय सेवा योजना विभागाचे सर्वत्र अभिनंदन होत आहे.
