झाडशहापुरजवळ कुत्रा दुचाकीसमोर आल्याने अपघात; गंभीर जखमी महिलेचा मृत्यू

 

नियंत्रणाच्या उपाययोजना कागदावरच?

बेळगाव : शहरापासून ग्रामीण भागापर्यंत भटक्या कुत्र्यांचा वाढता उपद्रव नागरिकांच्या जीवावर उठला असताना, संबंधित प्रशासनाला जाग कधी येणार, असा संतप्त सवाल उपस्थित होत आहे. रस्त्यांवर भटक्या कुत्र्यांचे कळप, वाहनांसमोर अचानक येणारे कुत्रे आणि त्यामुळे होणारे अपघात हे चित्र नित्याचे बनले आहे. कुत्र्यांच्या चाव्याच्या घटनांबरोबरच त्यांच्या अचानक रस्त्यावर येण्यामुळे होणाऱ्या दुर्घटनांकडेही गांभीर्याने पाहण्याची गरज आहे. झाडशहापुरजवळ दुचाकीसमोर कुत्रा आडवा आल्याने झालेल्या अपघातात गंभीर जखमी झालेल्या मजगाव येथील महिलेचा उपचारादरम्यान मृत्यू झाल्याने या प्रश्नाचे गांभीर्य पुन्हा एकदा अधोरेखित झाले आहे.

रेणुका कल्लाप्पा सुतार (वय ३७, रा. मजगाव) असे मृत महिलेचे नाव आहे. २१ ऑक्टोबर रोजी दुपारी सुमारे १२ वाजता त्या पती आणि मुलांसमवेत मोटारसायकलवरून कक्केरी यात्रेला जात होत्या. झाडशहापुरजवळ अचानक कुत्रा दुचाकीसमोर आल्याने चालकाचे नियंत्रण सुटले. या अपघातात रेणुका सुतार दुचाकीवरून पडून गंभीर जखमी झाल्या. त्यांना त्याच दिवशी खासगी रुग्णालयात दाखल करून उपचार सुरू करण्यात आले; मात्र, उपचारादरम्यान रविवारी त्यांची प्राणज्योत मालवली. त्यांच्या पश्चात पती, मुलगा आणि मुलगी असा परिवार आहे.

अपघातानंतरच प्रशासनाला जाग येणार का?

भटक्या कुत्र्यांच्या समस्येवर नियंत्रण ठेवण्याची जबाबदारी नेमकी कोणाची, हा प्रश्न आता ऐरणीवर आला आहे. रस्त्यांवर कुत्र्यांचा वाढता वावर, वाहनचालकांना निर्माण होणारा धोका आणि नागरिकांच्या सुरक्षिततेचा प्रश्न याकडे संबंधित यंत्रणा किती गांभीर्याने पाहत आहेत, याचे उत्तर या दुर्घटनेतून मागितले जात आहे.

भटक्या कुत्र्यांच्या चाव्याच्या घटना घडल्यानंतर चर्चा होते; अपघात झाल्यानंतर चिंता व्यक्त केली जाते; मात्र, प्रत्यक्षात प्रतिबंधात्मक उपाययोजना कितपत केल्या जातात, याचा हिशेब कोण देणार? नागरिकांच्या सुरक्षिततेसाठी जबाबदार असलेल्या संबंधित विभागांनी केवळ दुर्घटनांनंतर हालचाल करण्याऐवजी आधीच उपाययोजना करणे अपेक्षित आहे.

लोकप्रतिनिधींचेही लक्ष कुठे?

भटक्या कुत्र्यांचा प्रश्न केवळ एखाद्या गल्लीपुरता किंवा शहरापुरता मर्यादित राहिलेला नाही. ग्रामीण रस्त्यांवरही वाहनचालकांना या समस्येचा सामना करावा लागत आहे. त्यामुळे संबंधित प्रशासकीय विभागांसह स्थानिक लोकप्रतिनिधींनीही या प्रश्नाकडे गांभीर्याने लक्ष देण्याची गरज आहे.

भटक्या कुत्र्यांच्या नियंत्रणासाठी नियोजनबद्ध उपाययोजना, धोकादायक ठिकाणी प्रतिबंधात्मक कार्यवाही आणि नागरिकांच्या तक्रारींवर तातडीने प्रतिसाद देणारी यंत्रणा उभारणे आवश्यक आहे. प्राण्यांवरील क्रूरता टाळत, कायदेशीर तरतुदींच्या चौकटीत प्रभावी उपाययोजना राबविणेही तितकेच महत्त्वाचे आहे.

रेणुका सुतार यांच्या मृत्यूने एका कुटुंबावर दुःखाचा डोंगर कोसळला आहे. मात्र, या घटनेतूनही प्रशासनाने धडा घेतला नाही, तर भविष्यात अशा दुर्घटना घडण्याचा धोका कायम राहील. नागरिकांच्या जीविताचे संरक्षण करण्याची जबाबदारी असलेल्या यंत्रणा आता तरी जाग्या होणार का, की आणखी एखाद्या दुर्घटनेनंतरच उपाययोजनांची घोषणा केली जाणार, असा प्रश्न उपस्थित होत आहे.