अजान नगरातील रखडलेल्या कॉर्पोरेशन कॉम्प्लेक्सचे काम उद्यापासून सुरू होणार!

₹४.९ कोटींच्या विशेष निधीतून उभारणार ११६ दुकानांचा व्यावसायिक संकुल; सहा ते सात महिन्यांत काम पूर्ण करण्याचे उद्दिष्ट

बेळगाव : बेळगाव उत्तरचे आमदार आसिफ (राजू) सेठ यांच्या पुढाकारातून अजान नगर येथील एपीएमसी रोडवरील दीर्घकाळापासून रखडलेल्या कॉर्पोरेशन कॉम्प्लेक्सच्या बांधकामाला अखेर गती मिळणार आहे. ₹४.९ कोटींच्या विशेष निधीतून या प्रकल्पाचे काम उद्यापासून पुन्हा सुरू करण्यात येणार असल्याची माहिती आमदार सेठ यांनी दिली.

दीर्घकाळ प्रलंबित असलेला हा प्रकल्प पुढील सहा ते सात महिन्यांत पूर्ण करण्याचे उद्दिष्ट ठेवण्यात आले आहे. या कॉम्प्लेक्समध्ये एकूण ११६ दुकानांची उभारणी करण्यात येणार असून, त्यामुळे स्थानिक व्यापारी आणि लघु व्यावसायिकांना व्यवसायाच्या नव्या संधी उपलब्ध होणार आहेत. यामुळे परिसरात रोजगारनिर्मिती होण्याबरोबरच आर्थिक उलाढालीलाही चालना मिळण्याची अपेक्षा आहे.

एपीएमसी रोडवरील वाढती वर्दळ आणि व्यापारी हालचाली लक्षात घेता, या कॉम्प्लेक्समुळे परिसराच्या व्यावसायिक विकासाला अधिक गती मिळेल. तसेच व्यापाऱ्यांना व्यवसायासाठी आवश्यक सुविधा उपलब्ध होतील आणि स्थानिक अर्थव्यवस्थेला बळकटी मिळेल.

प्रलंबित विकासकामांना प्राधान्य

जनतेला दिलेली आश्वासने प्रत्यक्षात उतरवणे आणि दीर्घकाळापासून रखडलेली विकासकामे पूर्ण करणे हे आपले प्राधान्य असल्याचे आमदार आसिफ (राजू) सेठ यांनी सांगितले. कॉम्प्लेक्सचे बांधकाम सुरळीतपणे पुढे नेऊन निर्धारित कालावधीत पूर्ण करण्यासाठी आवश्यक ती कार्यवाही करण्यात येईल, असेही त्यांनी स्पष्ट केले.

यावेळी युवा नेते अमान सेठ, बुडा आयुक्त शकील अहमद, वरिष्ठ अभियंते मंजुश्री व हनीफ, कॉर्पोरेशनचे अधिकारी आणि इतर मान्यवर उपस्थित होते.