बेळगाव : कर्नाटक सरकारच्या, पशु संगोपन व पशु वैद्यकीय सेवा विभाग मार्फत दि.05/01/2023 पासून येळ्ळूर येथे राष्ट्रीय रोग नियंत्रण कार्यक्रमांतरंगत लाळ खुरकत रोग नियंत्रण लसीकरण करण्यात येत आहे.
लाळखुरकत हा विषाणूजन्य आणि संसर्गजन्य आजार असून गायी, म्हशीं मध्ये मोठ्या प्रमाणावर आढळून येतो. लाळखुरकत रोगांमधील बाधीत जनावरांमध्ये ताप येणे, तोंडामध्ये किंवा जिभेवर फोड येणे, पायांच्या खुरामध्ये फोड येवून जखमा होणे, भूक मंदावणे, परिणामी दुग्ध उत्पादन कमी होणे अशा प्रकारची लक्षणे दिसून येतात. विशेषत: ओढ कामाच्या जनावरांमधील उदा. ऊस वाहतुकीचे बैल यांची कार्यक्षमता मोठया प्रमाणात कमी होते. अति गंभीर प्रसंगी जनावरें दगावण्याची संभावना असते. यामुळे मोठ्याप्रमणावर जनावरांचे जीवित व शेतकऱ्यांचे वित्त हानी होण्याची संभावना असते.
त्यामुळे शेतकऱ्यांच्या आणि पशुपालकांच्या हिताच्या दृष्टीने हे लसीकरण करून घेणे आवश्यक असून पशु संगोपन व पशु वैद्यकीय सेवा इलाखे व येळ्ळूर ग्रामपंचायतीच्या संयुक्त विद्यमाने दि.05/01/2023 पासून चार दिवस सकाळी 7 ते 10 पर्यंत येळ्ळूर येथे रोज राष्ट्रीय रोग नियंत्रण कार्यक्रमांतरंगत लाळ खुरकत रोग नियंत्रण लस देण्यासाठी पशु चिकित्सालय डॉक्टर घरोघरी भेट देत देणार आहेत. येळ्ळूर येथील अंदाजे 1800 जनावरांना लसीकरण करण्याचे उद्दीष्ट आहे. तसेच हे राष्ट्रीय लसीकरण विनामूल्य आसल्याची माहिती डॉक्टर शैलेश बलगे, पशुवैद्यकीय अधिकारी, येळ्ळूर यांनी दिली.
तरी सर्व शेतकरी आणि पशु पालकांनी या शिबिराचा लाभ घ्यावा असे आवाहन येळ्ळूर ग्रामपंचायत अध्यक्ष सतिश बाळकृष्ण पाटील यांनी केले आहे.
यावेळी येळ्ळूर ग्रामपंचायत अध्यक्ष सतिश बाळकृष्ण पाटील, सदस्य शिवाजी नांदुरकर, परशराम परीट आणि पशु चिकित्सालयाचे डॉक्टर उपस्थित होते.