खानापूर नगराध्यक्ष व उपनगराध्यक्षाचा कालावधी संपुष्टात

लवकरच नविन पदाधिकारी
खानापूर (प्रतिनिधी) : खानापूर शहराच्या नगरपंचायतीच्या नगराध्यक्ष व उपनगराध्यक्षाचा कालावधी येत्या काही दिवसांत संपुष्टात येणार आहे. त्यामुळे खानापूर शहरातील नगरसेवकातुन नगराध्यक्ष व उपनगराध्यक्षासाठी कोणते आरक्षण येणार याची चर्चा जोरदार सुरू आहे.
येत्या दोन वर्षे सहा महिन्यासाठी नुतन नगराध्यक्ष व उपनगराध्यक्षाचा कालावधी राहणार आहे.
मागील दोन वर्षे सहा महिन्यात मजहर खानापूरी व तसेच नारायण मयेकर या नगरसेवकांनी नगराध्यक्ष पदाचा कार्यभार सांभाळला. तर उपनगराध्यक्षाचा अडीच वर्षाचा मान लक्ष्मी अंकलगी यांनी सांभाळला.
आता पुढील अडीच वर्षाचा कालावधीत कोण नगराध्यक्ष व कोण उपनगराध्यक्षाचा मान मिळविणार याकडे खानापूर शहरातील नागरिकांचे लक्ष लागून आहे.
खानापूर शहरातील नगरपंचायतींच्या २० नगरसेवकातूनही नगराध्यक्ष व उपनगराध्यक्षाची रस्सीखेच सुरू होणार आहे.
मागील वेळेला खानापूर मतदारसंघात काँग्रेसचा आमदार होता. सध्या खानापूर मतदारसंघात भाजपचा आमदार आहे. याचा उपयोग नुतन नगराध्यक्ष व उपनगराध्यक्षाच्या पदाच्या निवडीसाठी होणार? अशी चर्चाही खानापूर शहरातील नागरिकांतून होताना दिसत आहे.