तळेवाडी ग्रामस्थांचे होणार स्थलांतर : जिल्हाधिकाऱ्यांची बैठक

बेळगाव : खानापूर तालुक्यातील भीमगड अभयारण्य कार्यक्षेत्रात राहणाऱ्या तळेवाडी ग्रामस्थांच्या स्थलांतराबाबत जिल्हाधिकारी मोहम्मद रोशन यांनी ग्रामस्थांची बैठक घेतली. भीमगड परिसरात अधिकारी व ग्रामस्थांची बैठक झाली. याप्रसंगी जिल्हाधिकारी मोहम्मद रोशन यांनी अभयारण्य सोडू इच्छिणाऱ्या कुटुंबांचे शासकीय मार्गदर्शक सूचनांनुसार पुनर्वसन केले जाईल, असे आश्वासन दिले.

अभयारण्यात राहणाऱ्या लोकांना रस्ता, पाणी, वीज आदी पायाभूत सुविधा पुरविणे अशक्य असल्याने तळेवाडी गावातील लोकांनी स्वेच्छेने स्थलांतरित होण्यास सहमती दिल्यास सर्व प्रकारची मदत तात्काळ दिली जाईल, असे जिल्हाधिकारी मोहम्मद रोशन यांनी सांगितले. यावेळी ग्रामस्थांनी सर्व कुटुंबांना पर्यायी जागा व घरे देण्याची विनंती केली.
यावर जिल्हाधिकारी मोहम्मद रोशन यांनी सांगितले की, शासनाच्या मार्गदर्शक सूचनांनुसार व्यवस्था केली जाईल.
पुनर्वसनासाठी शासनाने जारी केलेल्या अनुदानाचा वापर सुलभ व्हावा यासाठी जिल्हाधिकारी व पुनर्वसन समितीच्या नावे संयुक्त खाती उघडण्याचे निर्देश जिल्हाधिकारी व पुनर्वसन समिती सदस्य सचिवांनी वनविभागाच्या अधिकाऱ्यांना दिले.

जिल्हा पोलीस प्रमुख भीमाशंकर गुळेद, डीसीएफ मारिया क्रिस्तराज, एसीएफ सुनीता निंबरगी, खानापूर तहसीलदार प्रकाश गायकवाड यांच्यासह वन व महसूल विभागाचे अधिकारी व तळेवाडी ग्रामस्थ या बैठकीला उपस्थित होते.