टायगर श्रॉफ गोळीबार प्रकरणाला नवे वळण; दोन महिलांसह अल्पवयीनाचा सहभाग उघड

 

दिल्ली पोलिसांकडून आणखी चार आरोपींना अटक; शस्त्रांची दिल्ली ते मुंबई वाहतूक केल्याचा आरोप

मुंबई : बॉलिवूड अभिनेता टायगर श्रॉफ याच्यावरील गोळीबार प्रकरणाच्या तपासाला नवे वळण मिळाले आहे. या प्रकरणात दिल्ली पोलिसांनी दोन महिलांसह आणखी चार जणांना अटक केली आहे. अटक केलेल्यांमध्ये एका अल्पवयीनाचाही समावेश असल्याचे वृत्त आहे. या कारवाईमुळे गोळीबारामागील कथित गुन्हेगारी नेटवर्क उघड होण्याची शक्यता व्यक्त केली जात आहे.

पोलिसांनी अटक केलेल्या आरोपींची नावे राधा, बबिता, सुमित आणि कुणाल अशी आहेत. त्यांना पुढील तपासासाठी मुंबई पोलिसांच्या ताब्यात देण्यात आले आहे. राधा आणि बबिता यांनी गोळीबारासाठी वापरण्यात आलेली शस्त्रे दिल्लीहून रेल्वेने मुंबईत आणल्याचा आरोप आहे. तर सुमित आणि कुणाल यांनी ही शस्त्रे उपलब्ध करून दिल्याचे तपासात समोर आल्याचे वृत्त आहे.

तपास यंत्रणांच्या माहितीनुसार, शस्त्रांची वाहतूक करताना दोन्ही महिला एन्क्रिप्टेड मेसेजिंग अ‍ॅपद्वारे कुणालच्या संपर्कात होत्या. गोळीबाराची जबाबदारी स्वीकारल्याचा दावा करणारा अनिल पंडित हा कुणालच्या संपर्कात होता आणि त्याला सूचना देत होता, असेही तपासात निष्पन्न झाल्याचे सांगण्यात येत आहे.

मुंबईत पोहोचल्यानंतर दोन्ही महिलांनी एका हॉटेलमध्ये मुक्काम केला. त्यानंतर शस्त्रे असलेली बॅग एका अल्पवयीन मुलाकडे दिल्याचा आरोप आहे. पुढे त्याच दिवशी संध्याकाळी गोळीबार झाल्याचे वृत्त आहे.

राधा आणि बबिता या उत्तर प्रदेशातील, तर सुमित आणि कुणाल हे हरियाणातील रहिवासी असल्याचे सांगण्यात आले आहे. राधा आणि बबिता यांना दिल्लीत, तर सुमित आणि कुणाल यांना हरियाणातील सोनीपत येथे अटक करण्यात आली.

दरम्यान, या प्रकरणात आणखी कोणाचा सहभाग आहे का, तसेच गोळीबारामागील नेमका हेतू काय होता, याचा तपास मुंबई पोलीस करत आहेत. अटक केलेल्या आरोपींवरील आरोप अद्याप तपासाधीन आहेत.