मतभेद बाजूला ठेवून २०२३ च्या निवडणुकीला सामोरे जा

खर्गे यांचा पक्षातील नेत्यांना सल्ला, अभिनंदन मेळाव्यात मोठी गर्दी

बंगळूर : एआयसीसीचे नवनिर्वाचित अध्यक्ष मल्लिकार्जुन एम. खर्गे यांनी रविवारी सायंकाळी पक्षाच्या वरिष्ठ नेत्यांना, मतभेद बाजूला ठेवून २०२३ च्या विधानसभा निवडणुकीत कर्नाटकमध्ये काँग्रेसला पुन्हा सत्तेत आणण्याचे स्पष्ट आवाहन केले. भाजपमध्ये देखील आपापसात ऐक्याचा अभाव असल्याचे सांगून कॉंग्रेस पक्षातही मतभेद असल्याचे त्यांनी अप्रत्यक्षपणे कबूल केले.

एआयसीसीच्या अध्यक्षपदी निवडून आल्यानंतर येथील पॅलेस ग्राउंड्स ‘सर्वोदय मेळावा’ कार्यक्रमात खर्गे यांनी हजेरी लावली. एआयसीसीचे सरचिटणीस रणदीप सिंग सुरजेवाला हे छोटे-छोटे खड्डे भरून काढत आहेत, नाराज नेत्यांनाही विश्वासात घेतले पाहिजे, असे त्यांनी सुचवले.
विमानतळापासून ते कार्यक्रमापर्यंत पक्षाच्या नेत्यांनी केलेले जल्लोषपूर्ण स्वागत पाहून नम्र झालेले खर्गे म्हणाले, की २०२३ ची निवडणूक जिंकणे आमच्यासाठी अधिक महत्त्वाचे आहे. कठोर परिश्रम केल्याशिवाय, विचारधारा स्पष्ट करून कोणीही पक्षाच्या पदासाठी लढू शकत नाही, असा स्पष्ट संदेश त्यांनी दिला.
दरम्यान, पंतप्रधान नरेंद्र मोदी यांना छोट्या-छोट्या कामाचे श्रेय घेण्याची सवय असल्याचा दावा खर्गे यांनी केला. ते म्हणाले, गुजरातमधील मोरबी येथे कोसळलेल्या पुलाचे काही दिवसांपूर्वीच त्यांच्या हस्ते उद्घाटन करण्यात आले होते.
गुजरात, हिमाचल प्रदेश आणि कर्नाटकमधील विधानसभा निवडणुकांसह २०२४ च्या लोकसभा निवडणुकांवर लक्ष ठेवून केंद्र सरकारने रेल्वेतील १.३५ लाख रिक्त जागा भरण्याचे आश्वासन दिले आहे, असा दावाही त्यांनी केला.
माजी केंद्रीय मंत्री के. एच. मुनियप्पा यांनी पक्षातील गटबाजीचा मुद्दा उपस्थित करताना सर्व नेत्यांना एकत्रित आघाडी करून मीडियाला चुकीचे सिद्ध करण्यास सांगितले. पुढील सहा महिन्यांत निवडणुका आहेत. दलित, शेतकरी, गरिबांच्या हक्कांचे रक्षण करून खर्गे यांचे मार्गदर्शन घेतले पाहिजे. केवळ एकच मुख्यमंत्री होऊ शकतो म्हणून सर्वांनी एकजूट दाखवली पाहिजे, असा सल्ला त्यांनी दिला.
विरोधी पक्षनेते सिद्धरामय्या यांनीही कबूल केले की, पक्षातील नेत्यांमध्ये छोटे मतभेद असू शकतात, परंतु प्रत्येकाने ते राज्यातील भाजप सरकार हटवण्याचे आव्हान मानले पाहिजे. जातीयवादी, गरीबविरोधी, शेतकरीविरोधी आणि अल्पसंख्याकविरोधी सरकारला सत्तेतून काढून टाकण्याचे आव्हान आपल्यासमोर आहे. याबाबत राज्यातील जनतेने आधीच निर्धार केला आहे, असे निरीक्षण त्यांनी नोंदवले.
सुरजेवाला म्हणाले की, सोनिया गांधींच्या नेतृत्वाखाली काँग्रेसने ज्या प्रकारे केले त्याप्रमाणे भाजप स्वत:चा अध्यक्ष निवडू शकत नाही. राज्यातील समस्या, करार, जातीयवाद आणि ‘४० टक्के कमिशन’चे मुद्दे उपस्थित करून खर्गे कर्नाटकात सरकार स्थापन करतील, अशी आशा व्यक्त केली.

वाहतूक कोंडीचा मुख्यमंत्र्यांनाही फटका
काँग्रेसच्या ‘सर्वोदय समावेश’ला हजारो नेते आणि सदस्य उपस्थित असल्याने, पॅलेस ग्राऊंडच्या भोवती वाहतूक कोंडी झाली होती, इतके की मुख्यमंत्री बसवराज बोम्मई यांच्या ताफ्यालाही थोडा वेळ थांबावे लागले. बोम्मई एका सार्वजनिक कार्यक्रमात सहभागी होण्यासाठी बयातरायणपुर येथे जात असताना पॅलेस गुट्टाहल्ली येथे त्यांचा ताफा काही काळ वाहतुकीत अडकला.
सकाळी साडेअकरा वाजता केम्पेगौडा आंतरराष्ट्रीय विमानतळावर खर्गे यांचे स्वागत केल्यानंतर, कल्याण कर्नाटकातील त्यांच्या अनुयायांनी त्यांचा पाठपुरावा कार्यक्रमस्थळाजवळील सदाशिवनगर येथील त्यांच्या निवासस्थानापर्यंत केला होता, ज्यामुळे मुख्यमंत्र्यांसह वाहनधारकांची गैरसोय झाली, असे सूत्रांनी सांगितले. मोठा जनसमुदाय कार्यक्रमस्थळाकडे जात असल्याने वाहतूक सुरळीत करण्यात पोलिसांची दमछाक झाली. नंतर मुख्यमंत्र्यांचा रस्ता सुरळीत पार पाडण्यासाठी वाहतूक सुरळीत करण्यात यश आले.