जागतिक पर्यावरण दिनानिमित्त डीएमएस महाविद्यालयात वृक्षारोपण

नंदगड : जागतिक पर्यावरण दिनाचे औचित्य साधून जायंट्स ग्रुप ऑफ बेळगाव सखीच्या वतीने नंदगड येथील डीएमएस पदवीपूर्व महाविद्यालयात वृक्षारोपण कार्यक्रम उत्साहात पार पडला. पर्यावरण संवर्धनाचा संदेश देत विविध प्रजातींच्या रोपांची लागवड करण्यात आली.

कार्यक्रमाच्या अध्यक्षस्थानी महाविद्यालयाच्या प्राचार्या दीपा हन्नूरकर उपस्थित होत्या. शाळा सुधारणा समितीचे अध्यक्ष रमाकांत पाटील तसेच महाविद्यालय सुधारणा समितीचे अध्यक्ष एम. आर. पाटील हे प्रमुख पाहुणे म्हणून उपस्थित होते.

यावेळी मान्यवरांनी विद्यार्थ्यांना पर्यावरण संरक्षणाचे महत्त्व पटवून देत प्रत्येकाने किमान एक तरी झाड लावून त्याचे संगोपन करण्याचा संकल्प करावा, असे आवाहन केले. वाढते प्रदूषण आणि बदलते हवामान लक्षात घेता वृक्षसंवर्धन ही काळाची गरज असल्याचे त्यांनी नमूद केले.

जायंट्स ग्रुप ऑफ बेळगाव सखीच्या अध्यक्षा सुलक्षणा शिरोळकर यांनी संस्थेच्या विविध सामाजिक उपक्रमांची माहिती देत जागतिक पर्यावरण दिनाचे महत्त्व विशद केले. पर्यावरण संवर्धनासाठी समाजातील प्रत्येक घटकाने सक्रिय सहभाग नोंदविण्याची गरज असल्याचे त्यांनी सांगितले.

कार्यक्रमास फेडरेशनच्या अपर्णा पाटील, शीतल पाटील, राजश्री हसबे, दीपा पाटील, स्वाती फडके, अर्चना कंगराळकर, नम्रता महागावकर, वरदा अंगडी, शीतल नेसरीकर, दीपा मुतकेकर यांच्यासह शिक्षक, कर्मचारी आणि विद्यार्थी मोठ्या संख्येने उपस्थित होते.