ताराराणी पदवीपूर्व महाविद्यालयातील महिला कबड्डीपट्टूंची राष्ट्रीय स्तरावर रोमहर्षक धडक

खानापूर : खानापूरच्या ताराराणी महाविद्यालयाच्या तीन कबड्डीकन्यांची राष्ट्रीय फेडरेशन स्पर्धेसाठी ऐतिहासिक निवड झाली असून मध्य प्रदेशातील ३७ व्या अखिल भारतीय स्पर्धेत दक्षिण मध्य क्षेत्र संघाकडून खेळताना दिव्या शिरोडकर, रेणुका गुरव आणि पल्लवी पाटील यांच्या चढाया अन् पकडीच्या अफाट कौशल्याच्या जोराव गाजवली. कबड्डीची अद्ययावत मैदाने, हरियाणाविरुद्धच्या अंतिम सामन्यातील थराराने उंचावली संपूर्ण देशाची मान, महाराष्ट्राच्या आणि कर्नाटकच्या सीमेवरील मातीतून एक अत्यंत सुवर्णकाळ घडवणारी बातमी समोर आली आहे. विद्या भारती शिक्षण संस्था आयोजित 37 व्या अखिल भारतीय (U-17) कबड्डी स्पर्धेत खानापूरच्या मराठा मंडळ ताराराणी पी. यू. कॉलेजच्या तीन अष्टपैलू खेळाडूंनी राष्ट्रीय स्तरावर अक्षरशः इतिहास रचला आहे.
मध्य प्रदेशातील बैतूल येथील सीबीएसई विद्यालय, जामठी येथे पार पडलेल्या या क्रीडा महाकुंभामध्ये देशभरातून 11 दिग्गज संघ दाखल झाले होते. दोन स्वतंत्र गटांत विभागलेल्या या अटीतटीच्या स्पर्धेत, दक्षिण मध्य क्षेत्र (South Central Zone) संघाचे प्रतिनिधित्व करताना ताराराणीच्या कु.दिव्या शिरोडकर, रेणुका गुरव आणि पल्लवी पाटील या तीन मराठी कन्यांनी आपल्या रॉकेटसारख्या चढाया (Riding) आणि पोलादी पकडीच्या (Defending) जोरावर संपूर्ण स्पर्धेवर आपले निर्विवाद वर्चस्व निर्माण केले. त्यांच्या याच अफाट व अष्टपैलू खेळाच्या जोरावर आगामी नोव्हेंबर महिन्यात होणाऱ्या अत्यंत प्रतिष्ठित अशा ‘नॅशनल फेडरेशन’ स्तरावरील स्पर्धेसाठी ताराराणीच्या या तीन खेळाडूंची अधिकृत आणि दिमाखदार निवड पक्की झाली आहे.
स्पर्धेच्या सुरुवातीपासूनच दक्षिण मध्य क्षेत्र संघाचा जलवा मैदानभर पाहायला मिळाला. लीग साखळी सामन्यांमध्ये या मुलींनी प्रतिस्पर्धी संघांना अक्षरशः गुडघे टेकवायला भाग पाडले. पहिल्याच सामन्यात राजस्थानविरुद्ध मैदानात उतरलेल्या या संघाने सुरुवातीपासूनच आक्रमक पवित्रा घेत तब्बल 50 गुणांच्या प्रचंड फरकाने एकतर्फी विजय मिळवला आणि आपल्या मोहिमेची धडाकेबाज सुरुवात केली. दुसऱ्या सामन्यात गुजरातच्या संघासमोर या तीन वाघिणीनी पुन्हा एकदा तुफानी खेळी करीत तब्बल 40 गुणांच्या विनाअडथळा फरकाने गुजरातचा धुव्वा उडवला. तिसऱ्या सामन्यात घरच्या मैदानावर खेळणाऱ्या यजमान मध्य प्रदेश संघाला या खेळाडूनी खाते उघडायलाही
कसलीच संधी दिली नाही आणि तब्बल 47 गुणांच्या महाप्रचंड फरकाने मध्य प्रदेशला लोळवले. चौथा सामना पश्चिम उत्तर प्रदेशविरुद्ध अत्यंत रोमहर्षक व चुरशीचा ठरला, जिथे दोन्ही बाजूंच्या खेळाडूंनी प्राणाची बाजी लावली; या अटीतटीच्या संघर्षात अखेर अवघ्या 2 गुणांच्या अत्यंत अल्प फरकाने संघाला पराभव स्वीकारावा लागला. परंतु, संपूर्ण साखळी सामन्यांमधील त्यांच्या अफाट गुणांची सरशी पाहता संघाने दिमाखात थेट अंतिम फेरीत धडक मारली.
अंतिम सामन्याची गोष्टच वेगळी होती. दक्षिण मध्य क्षेत्र संघाचा सामना होता बलाढ्य आणि तितकाच अनुभवी हरियाणा संघाशी हा सामना म्हणजे प्रेक्षकांच्या अंगावर काटा आणणारा एक महासंग्राम होता. मैदानावर प्रत्येक सेकंदाला श्वास रोखवणारी ती धडपड, कबड्डी-कबड्डीचा निनाद आणि गुणांची चाललेली चढाओढ उपस्थितांच्या हृदयाचे ठोके वाढवणारी होती. अखेरच्या श्वासापर्यंत चाललेल्या या अटीतटीच्या महामुकाबल्यात हरियाणाने 45 विरुद्ध 47 अशा अगदी निसरड्या व अवघ्या 2 गुणांच्या फरकाने विजय मिळवला. सुवर्ण ताज जरी अवघ्या दोन गुणांनी हुकला असला, तरी या संघाने गाजवलेला हा पराक्रम आणि मिळवलेले उपविजेतेपद संपूर्ण स्पर्धेत सर्वात मोठे आकर्षण ठरले.
या रोमहर्षक आणि ऐतिहासिक यशाने संपूर्ण महाविद्यालयात आणि ग्रामीण भागात आनंदाचे व उत्साहाचे वातावरण पसरले आहे. मराठा मंडळ शिक्षण संस्थेच्या अध्यक्षा मा. डॉ. राजश्री नागराजू (हलगेकर) यांनी आपल्या भावना व्यक्त करताना अत्यंत अभिमानास्पद नोंद नोंदवली आहे.
“खानापूरच्या ग्रामीण भागातील विद्यार्थिनींनी राष्ट्रीय स्तरावर दाखवलेले हे कौशल्य, हिंमत आणि मिळवलेले यश संपूर्ण संस्थेसाठी सुवर्णक्षरी नोंद ठेवण्यासारखे आहे. त्यांची नॅशनल फेडरेशन स्पर्धेसाठी झालेली निवड ही ग्रामीण भागातील इतर हजारो मुलींना क्रीडा क्षेत्रात उत्तुंग भरारी घेण्यासाठी कायमची प्रेरणा देईल.”
खेळाडूंच्या या देदीप्यमान यशाबद्दल कॉलेजचे प्राचार्य श्री. अरविंद पाटील, संचालक श्री. शिवाजीराव पाटील, क्रीडा शिक्षक प्रशांत पाखरे यांच्यासह सर्व प्राध्यापक वर्ग, शिक्षकेतर कर्मचारी आणि संस्था व्यवस्थापनाने सर्व विजयी विद्यार्थिनींच्या पाठीवर कौतुकाची थाप दिली असून आगामी नोव्हेंबरमधील नॅशनल फेडरेशन स्पर्धेसाठी त्यांना मनःपूर्वक आणि उदंड शुभेच्छा दिल्या आहेत.