इंडिया आघाडीला चौथा धक्का; ‘आप’ पंजाब, चंदीगडमध्ये स्वतंत्र लढणार

नवी दिल्ली : लोकसभा निवडणुकीच्या आधी इंडिया आघाडीला आणखी एक मोठा झटका बसला आहे. नितीश कुमार, ममता बॅनर्जी आणि अखिलेश यादव यांच्यानंतर आता आम आदमी पक्षाचे नेते आणि दिल्लीचे मुख्यमंत्री अरविंद केजरीवाल देखील काँग्रेसवर नाराज झाले आहेत. केजरीवाल यांनी चंदीगड आणि पंजाब येथे लोकसभा निवडणुकीत कोणासोबत आघाडी करणार नसल्याची घोषणा केली आहे.

‘आप’ने पंजाब आणि चंदीगडमधील १४ जागांवर स्वबळावर निवडणुक लढवणार असल्याचे सांगितले आहे. पक्षाने एक्स या सोशल मीडियावर अरविंद्र केजरीवाल यांचा एक व्हिडिओ शेअर केला आहे, ज्यात त्यांनी ही घोषणा केली. आपचे संयोजक अरविंद केजरीवाल यांनी सांगितले की, पंजाबमधील १३ आणि चंदीगडमधील १ अशा लोकसभेच्या १४ जागांवर आप स्वबळावर निवडणुका लढणार आहे. झाडू चिन्हाच्या समोरचे बटण दाबा आणि आपला १४ च्या १४ जागांवर विजय मिळवून द्या अशी विनंती मी करतो.

याआधी काँग्रेससोबत जागा वाटपाची चर्चा सुरू असताना पंजाबचे मुख्यमंत्री भगवंत मान यांनी म्हटले होते की, आम आदमी पार्टी आगामी लोकसभा निवडणुकीत १३ जागांवर लढणार आहे. राज्यात पक्ष कोणासोबत ही आघाडी करणार नाही. पंजाबमध्ये यावेळी आप इतिहास घडवणार असून राज्यातील सर्व १३ जागांवर विजय मिळवणार असल्याचे मान यांनी सांगितले होते.

इंडिया आघाडीतून आधी बिहारचे मुख्यमंत्री नितीश कुमार बाहेर पडले होते. त्यांनी भाजपसोबत राज्यात सरकार स्थापन केले आणि एनडीएमध्ये जाण्याचा निर्णय घेतला. त्यानंतर ममता बॅनर्जी यांनी पश्चिम बंगालमध्ये एकट्याने लढणार असल्याचे सांगितले. तर उत्तर प्रदेशमध्ये अखिलेश यादव यांनी देखील सपाची पहिली यादी जाहीर केली. आता ‘आप’ने पंजाबमध्ये एकट्याने लढण्याची घोषणा केली आहे.