टेंडर घोटाळ्यातून भाजप सरकारची हजारो कोटींची लूट

काँग्रेसचा आरोप; ठेकेदार, अधिकाऱ्यांविरूध्द फौजदारी खटल्याचा इशारा

बंगळूर : राज्य निवडणुकीच्या उंबरठ्यावर असताना राजकीय पक्षांच्या राजकीय हालचाली वाढल्या असून सत्ताधाऱ्यांना कोंडीत पकडण्याची आणि आरोप-प्रत्यारोप करण्याची विरोधकांची रणनीती सुरूच आहे. काँग्रेस नेत्यांनी आज बंगळुरमध्ये तातडीची पत्रकार परिषद बोलावून सत्ताधारी भाजपच्या भ्रष्टाचारावर जोरदार हल्ला केला. या प्रकरणात सामिल असलेल्या ठेकेदार, अधिकाऱ्यांविरूध्द फौजदारी खटले दाखल करण्याचा त्यांनी इशारा दिला.
राज्यातील भाजप सरकारवर भ्रष्टाचार आणि ४० टक्के कमिशनचे आरोप पूर्वीपासून होत आहेत. कंत्राटी कामात मंत्री आणि आमदारांना कंत्राटदारांकडून ४० टक्क्यांपर्यंत कमिशन मिळत असल्याचा आरोप कंत्राटदार संघटनेच्या अध्यक्षांनी केला होता. या आरोपामुळे के. एस. ईश्वरप्पा यांना मंत्रीपद गमवावे लागले. कंत्राटदारांच्या संघटनेच्या आरोपाला काँग्रेसने समर्थन केले.
आज याच मुद्द्यावर काँग्रेस नेत्यांनी डी. के. शिवकुमार यांच्या सदाशिवनगर, बंगळुर येथील निवासस्थानी तातडीची पत्रकार परिषद बोलावून भाजप सरकार आणि मुख्यमंत्री बसवराज बोम्मई यांच्यावर आरोप केले.
विरोधी पक्षनेते सिद्धरामय्या म्हणाले की, सरकार राज्याच्या तिजोरीची लूट करत आहे आणि घाईघाईने सर्व प्रकल्प मंजूर करत आहे. जनतेच्या कराच्या पैशाचे रक्षण करणे ही आपली जबाबदारी आहे. टेंडरचे पैसे जास्त असतील तर जास्त कमिशनची मागणी करण्यात येत असल्याचा त्यांनी आरोप केला.
जास्त कमिशन देणाऱ्यांना मंत्री कंत्राटे देत आहेत. चाळीस टक्के कमिशन घोटाळ्याचा हा प्रकार सुरू आहे. मी ठेकेदार आणि अधिकाऱ्यांना ताकीद दिली आहे. आम्ही याला त्याच्या तार्किक अंतापर्यंत नेतो. ठेकेदार आणि अधिकाऱ्यांवर फौजदारी गुन्हा दाखल करण्यात येणार आहे. कोणालाही सोडणार नाही, सर्वांना तुरुंगात टाकले जाईल. सत्तेत येताच सर्व कामांची चौकशी करू. सत्तेवर येताच ४० टक्के कमिशन घोटाळ्याची चौकशी करू, असे ते म्हणाले.
एकाच दिवसात १८ हजार कोटीचे बिल झाले. भाजपचे आमदार गोळीहट्टी शेखर यांनी सरकारला पत्र लिहिले आहे. ते म्हणाले की, ते निवडणूक निधी उभारण्यासाठी टेंडर घोटाळा करत आहेत.
पत्रकार परिषदेत बोलताना डी. के. शिवकुमार यांनी भाजपच्या हजारो कोटींच्या बेकायदेशीर निविदा निवडणुकीच्या तोंडावर उघड झाल्याचे सांगितले.
नाराज आमदारांना खूश करण्यासाठी टेंडर पैसे असून, ज्यांना मंत्रीपद मिळाले नाही, त्यांना टेंडरची ऑफर देण्यात आली आहे. हा साधा घोटाळा नाही, तर हजारो कोटींची लूट आहे. केपीसीसीचे अध्यक्ष शिवकुमार यांनी खंडणीच्या पैशातून निवडणुकाना सामोरे जाणार असल्याचा सरकारवर हल्ला केला आणि राज्य सरकार भ्रष्टाचारात बुडाल्याचा आरोप केला.