गणेशोत्सवाच्या उंबरठ्यावर पोलीस आयुक्त भूषण बोरसे यांच्या बदलीला तात्पुरती स्थगिती?

सण-उत्सवाच्या काळात बदली करू नये, नागरिकांमधून व्यक्त होत आहे सूर

बेळगाव : पोलिस आयुक्त भूषण गुलाबराव बोरसे यांची हुबळी-धारवाडच्या पोलीस आयुक्तपदी झालेली बदली ऐन गणेशोत्सवाच्या तोंडावर वादाच्या भोवऱ्यात सापडली आहे. शासनाकडून ही बदली तात्पुरती थांबवण्यात आल्याची माहिती सूत्रांनी दिली असून, यासंदर्भातील अधिकृत लेखी आदेश पुढील एक-दोन दिवसांत येण्याची शक्यता आहे. या घडामोडीमुळे राजकीय आणि प्रशासकीय वर्तुळात उलटसुलट चर्चांना उधाण आले आहे.
शनिवारी दुपारी पोलीस अधिकाऱ्यांच्या बदल्यांचे आदेश जाहीर झाल्यानंतर, रात्री उशिरा पोलीस दलाकडून भूषण बोरसे यांच्या हुबळी-धारवाड येथील बदलीसंदर्भात अधिकृत माहिती देण्यात आली होती. या पूर्वनियोजनानुसार, रविवारीच नूतन पोलीस आयुक्तांनी आपल्या पदाची सूत्रे हाती घेणे अपेक्षित होते. मात्र, ऐन रविवारी सकाळी हा पदभार स्वीकारण्याचा नियोजित कार्यक्रम अचानक स्थगित करण्यात आला.

गणेशोत्सवाचा काळ आणि जनमानसातील भावना
गणेशोत्सवासारखा मोठा सण तोंडावर असताना शहरात कायदा व सुव्यवस्था राखणे आणि बंदोबस्ताची कसरत पाहता पोलीस आयुक्तांची ऐनवेळी झालेली बदली प्रशासकीयदृष्ट्या योग्य ठरणार नाही, असा सूर नागरिक आणि विविध स्तरांतून उमटत आहे. उत्सव काळात प्रशासनात होणाऱ्या बदलांमुळे सुरक्षा व्यवस्थेवर परिणाम होऊ शकतो, अशी चिंता अनेक ठिकाणी व्यक्त केली जात आहे.
दरम्यान, या संपूर्ण प्रकरणावर शासन पातळीवर पुनर्विचार केला जात असून बदलीच्या आदेशाला स्थगिती मिळाल्याची चर्चा आहे. याबाबतचा सविस्तर आणि लेखी शासन आदेश हाती आल्यानंतरच यावरील चित्र पूर्णपणे स्पष्ट होईल, असे सांगण्यात येत आहे.