Belgaum Varta Belgaum Varta
दड्डी : मोदगे येथील एका पोल्ट्री फार्ममध्ये साप आढळल्याने काही काळ घबराटीचे वातावरण निर्माण झाले होते. मात्र सर्पमित्र धनंजय पाटील यांच्या तत्परतेमुळे सापाला कोणतीही इजा न होता सुरक्षितपणे पकडून जंगल परिसरात सोडण्यात आले.
मोदगे येथील आन्नाप्पा पाटील यांच्या पोल्ट्री फार्ममध्ये काम सुरू असताना अचानक साप दिसून आला. साप पाहताच कामगार व परिसरातील नागरिकांमध्ये भीतीचे वातावरण पसरले. याबाबत तात्काळ धोंडगट्टे येथील सर्पमित्र धनंजय पाटील यांना माहिती देण्यात आली.
माहिती मिळताच धनंजय पाटील यांनी घटनास्थळी धाव घेतली. त्यांनी अत्यंत कौशल्याने आणि कोणतीही इजा न करता सापाला पकडले. त्यानंतर सापाची ओळख पटवून तो विषारी नसल्याची खात्री केली आणि सुरक्षितरीत्या जंगल परिसरात सोडून दिले.
यावेळी धनंजय पाटील यांनी नागरिकांना साप दिसल्यास घाबरून जाऊ नये किंवा सापाला मारण्याचा प्रयत्न करू नये, असे आवाहन केले. अशा वेळी त्वरित सर्पमित्र किंवा वनविभागाशी संपर्क साधावा, असे त्यांनी सांगितले. साप हे पर्यावरणातील अन्नसाखळीतील महत्त्वाचे घटक असून उंदीर व इतर हानिकारक कीटकांवर नियंत्रण ठेवण्यात त्यांची महत्त्वाची भूमिका असल्याचेही त्यांनी स्पष्ट केले.
