मंत्री सतीश जारकीहोळी यांच्या नातेवाईकाच्या निवासस्थानीही ईडीची झडती

 

 

कर्नाटक-महाराष्ट्रातील अनेक ठिकाणी एकाचवेळी कारवाई

बेळगाव : सार्वजनिक बांधकाम मंत्री सतीश जारकीहोळी यांच्याशी संबंधित विविध ठिकाणांवर बुधवारी पहाटे सक्तवसुली संचालनालयाने (ईडी) मोठी शोधमोहीम हाती घेतली. कर्नाटक आणि महाराष्ट्रातील अनेक ठिकाणी एकाचवेळी झडती सुरू असून, सतीश जारकीहोळी यांचे मेव्हणे तथा बेळगाव विभागातील अबकारी खात्याचे अतिरिक्त आयुक्त वाय. मंजुनाथ यांच्या निवासस्थानीही तपास करण्यात येत आहे.

मिळालेल्या माहितीनुसार, बेळगाव, बंगळूरसह विविध ठिकाणांवरील सुमारे १८ ठिकाणी ईडीच्या पथकांकडून शोधमोहीम सुरू आहे. बंगळूरमधील डॉलर्स कॉलनी येथील मंत्री सतीश जारकीहोळी यांच्या निवासाचाही या कारवाईत समावेश असल्याचे सांगण्यात येत आहे. तसेच त्यांची कन्या व चिकोडी लोकसभा मतदारसंघाच्या खासदार प्रियांका जारकीहोळी यांच्याशी संबंधित काही ठिकाणीही तपास सुरू असल्याची माहिती सूत्रांनी दिली.

दरम्यान, सतीश जारकीहोळी यांचे दाजी वाय. मंजुनाथ यांच्या बेळगावातील दूरदर्शन नगर येथील निवासासह संबंधित ठिकाणी ईडी अधिकारी कागदपत्रे आणि आर्थिक व्यवहारांशी संबंधित माहितीची तपासणी करत आहेत. निमलष्करी दलाच्या बंदोबस्तात ही कारवाई सुरू असून, बंगळूर आणि गोव्यातून आलेल्या ईडीच्या अधिकाऱ्यांचा पथकात समावेश असल्याचे समजते.

२४ जून रोजीही झाली होती झडती

वाय. मंजुनाथ यांच्याशी संबंधित ठिकाणांवर ईडीने यापूर्वी २४ जून रोजीही शोधमोहीम राबविली होती. त्यावेळी बेळगाव, बंगळूर आणि म्हैसूरसह विविध ठिकाणी तपास करण्यात आला होता. लोकायुक्त पोलिसांनी नोंदविलेल्या प्रकरणाच्या आधारे मनी लॉन्डरिंग प्रतिबंधक कायद्यांतर्गत (पीएमएलए) ईडीकडून तपास सुरू असल्याचे त्यावेळी वृत्त आले होते.

अवैध मालमत्ता, बेनामी संपत्ती, आर्थिक व्यवहार तसेच परदेशातील व्यवहारांशी संबंधित आरोपांच्या अनुषंगाने तपास सुरू असल्याचे सांगण्यात येत आहे. काही वृत्तांनुसार, मागील कारवाईत रोख रक्कम, सोन्याचे दागिने आणि विदेशी चलनासह मोठ्या मूल्याची मालमत्ता आढळल्याची माहिती समोर आली होती.

वाय. मंजुनाथ हे सतीश जारकीहोळी यांच्या बहिणीचे पती असून, त्यांच्याविरोधात कथित अवैध मालमत्ता आणि संशयास्पद आर्थिक व्यवहारांबाबत चौकशी सुरू असल्याचे विविध वृत्तांत म्हटले आहे. बार परवाने देण्यातील कथित अनियमितता, बेनामी मालमत्ता आणि आर्थिक व्यवहारांबाबतही तपास यंत्रणा चौकशी करत असल्याचे सांगण्यात येत आहे.

मात्र, या प्रकरणातील आरोपांची चौकशी अद्याप सुरू असून, ते न्यायालयात सिद्ध होणे बाकी आहे. आजची शोधमोहीम पूर्ण झाल्यानंतर ईडीकडून कोणती कागदपत्रे किंवा मालमत्ता जप्त करण्यात आली, याबाबत अधिकृत माहिती स्पष्ट होण्याची अपेक्षा आहे.