शिवकुमारांच्या शिक्षण संस्थांवर सीबीआयचे छापे

बंगळूर : केपीसीसी अध्यक्ष डी. के. शिवकुमार यांच्या मालकीच्या शैक्षणिक संस्थांवर सीबीआयने छापे टाकले आहेत. बंगळुरच्या राजराजेश्वरी नगरमधील नॅशनल एज्युकेशन फाउंडेशनवर छापे टाकण्यात आले आहेत.
सध्या बेळगावात सुरू असलेल्या हिवाळी अधिवेशनात डी. के. शिवकुमार सहभागी झाले आहेत. याच पार्श्वभूमीवर बंगळुरमध्ये सीबीआयने छापे टाकले आहेत. अधिकाऱ्यांनी महत्त्वाची कागदपत्रे ताब्यात घेऊन त्याचा तपास सुरू केला असल्याचे कळते.
ईडी, आयकर अधिकारी आणि सीबीआयच्या अधिकाऱ्यांनी यापूर्वी शिवकुमार यांच्या घरावर छापा टाकला होता आणि त्या संदर्भात ते सध्या त्यांची चौकशी करत आहेत. शिवकुमार हे नॅशनल एज्युकेशन फाउंडेशनचे अध्यक्ष आहेत आणि त्यांची मुलगी ऐश्वर्या सचिव आहे. आज दुपारी दोनच्या सुमारास हा छापा घालण्यात आल्याचे सांगण्यात येत आहे.
या छाप्याबाबत प्रसारमाध्यमांना प्रतिक्रिया देताना शिवकुमार म्हणाले, ‘आज छाप्यादरम्यान आम्ही आमच्या विश्वस्तांना भेटलो आणि काही कागदपत्रे तपासत आहोत. माझ्या वकिलानाही मी दिलेल्या पैशांबाबत नोटीस देण्यात आली आहे. याशिवाय आमच्या गावात जाऊन तेथील जमीन व घराला वेढा घातला व तहसीलदारांकडून माहिती घेतली. माझ्यावर खटले सुरू असून सर्व बाजूंनी ते मला त्रास देत आहेत, असे ते म्हणाले.
मला सीबीआयच्या छाप्याची भीती नाही, मी कोणतीही चूक केलेली नाही. एच. विश्वनाथ अलीकडेच आर्थिक विषयावर उघड बोलले आहेत, पण त्याबद्दल कोणीही बोलायला तयार नाही. याशिवाय भाजपने विरोधकांना बरोबरीत रोखण्यासाठी पावले उचलली असून यासंदर्भात आम्ही जनतेसोबत न्यायालयात जाणार असल्याचे त्यांनी सांगितले.
सीबीआय निवडणुकीच्या पार्श्वभूमीवर माझ्यासह अनेकांना त्रास देत असल्याची खंत शिवकुमार यांनी दोन दिवसांपूर्वी कोप्पळमध्ये माध्यमांशी बोलताना व्यक्त केली होती.