Belgaum Varta Belgaum Varta
केरळ : सोशल मीडियावर लोकप्रिय असलेल्या केरळमधील अखिल (Akhil NRD) आणि मेघा या दाम्पत्याची सध्या सोशल मीडियावर जोरदार चर्चा सुरू आहे. इंस्टाग्रामवर लाखो फॉलोअर्स असलेल्या या ‘क्यूट कपल’ने रील्स आणि व्ह्लॉग्सच्या माध्यमातून मोठी लोकप्रियता मिळवली होती. मात्र, त्यांच्या वैवाहिक जीवनाबाबत आता एक धक्कादायक दावा समोर आला आहे.
अखिलने सोशल मीडियावर व्हिडिओ पोस्ट करत पत्नी मेघा ही स्थानिक बसमधील एका कंडक्टरसोबत घरातून निघून गेल्याचा गंभीर आरोप केला आहे. एवढेच नव्हे तर घरातील रोख रक्कम, सोन्याचे दागिने आणि काही मौल्यवान वस्तूही ती सोबत घेऊन गेल्याचा दावा अखिलने केला आहे.
व्हिडिओमध्ये अखिल भावुक झालेला दिसत असून, या घटनेमुळे आपल्याला मोठ्या मानसिक त्रासातून जावे लागत असल्याचे त्याने सांगितले. सोशल मीडियावर कायम आनंदी आणि सुखी दिसणाऱ्या या दाम्पत्याच्या आयुष्यात अचानक असा वाद निर्माण झाल्याने त्यांच्या चाहत्यांनाही धक्का बसला आहे.
मेघाकडून अद्याप कोणतीही प्रतिक्रिया नाही
या संपूर्ण प्रकरणावर मेघाकडून अद्याप कोणतीही अधिकृत प्रतिक्रिया समोर आलेली नाही. अखिलने केलेले आरोप नेमके कितपत खरे आहेत किंवा या घटनेमागील वास्तविक कारण काय आहे, हे अद्याप स्पष्ट झालेले नाही.
त्यामुळे मेघाची बाजू समोर आल्यानंतरच या प्रकरणातील वस्तुस्थिती स्पष्ट होण्याची शक्यता आहे. सोशल मीडियावर दिसणारे प्रत्येक हास्य हे खऱ्या आयुष्यातील आनंदाचे प्रतिबिंब असेलच असे नाही, तसेच प्रत्येक नाते बाहेरून दिसते तितके परिपूर्ण नसते, अशी चर्चा या घटनेनंतर सुरू झाली आहे.
सध्या अखिलचे आरोप सोशल मीडियावर व्हायरल होत असून, अधिकृत माहिती आणि दोन्ही बाजूंचे म्हणणे समोर आल्यानंतरच या प्रकरणाचे सत्य स्पष्ट होणार आहे.
