विधान परिषदेत काँग्रेसची सरशी; ७ पैकी ५ जागांवर विजय

 

भाजपला २ जागा, धजदचा उमेदवार पराभूत, क्रॉस व्होटींगमुळे भाजप-धजदला धक्का

बंगळूर : कर्नाटक विधान परिषदेच्या सात जागांसाठी गुरुवारी झालेल्या निवडणुकीत सत्ताधारी काँग्रेसने अपेक्षेपेक्षा अधिक यश मिळवत पाच जागांवर विजय मिळवला. भाजपच्या खात्यात दोन जागा गेल्या, तर जनता दल (धर्मनिरपेक्ष) अर्थात धजदला एकही जागा मिळाली नाही. काँग्रेसचे पाचवे उमेदवार विनय कार्तिक यांच्या विजयामुळे या निवडणुकीत क्रॉस व्होटिंगची चर्चा रंगली आहे.

विधानसौध येथे सकाळी ९ वाजल्यापासून मतदानास सुरुवात झाली होती. मतदान प्रक्रिया सायंकाळी ४ वाजता संपल्यानंतर मतमोजणी झाली आणि निकाल जाहीर करण्यात आला. विधानसभा सदस्यसंख्येच्या गणितानुसार काँग्रेसला चार आणि भाजपला दोन जागा निश्चित मानल्या जात होत्या. मात्र उर्वरित एका जागेसाठी काँग्रेस आणि धजदमध्ये चुरशीची लढत झाली. अखेरीस काँग्रेसचे उमेदवार विनय कार्तिक यांनी ३२ मते मिळवत विजय मिळवला, तर धजदचे गोविंदराजू यांना केवळ १४ मते मिळाल्याने त्यांचा पराभव झाला.

कोण निवडून आले?

काँग्रेसकडून बि. के. हरिप्रसाद, तिप्पण्णप्पा कामकनूर, पी. व्ही. मोहन, शिवण्णा मळवळी आणि विनय कार्तिक हे पाच उमेदवार विजयी झाले. भाजपकडून रघू कौटिल्य आणि लिंगराज पाटील यांनी विजय मिळवत विधान परिषदेत प्रवेश केला.

उमेदवारनिहाय मिळालेली मते

कॉंग्रेस
बि. के. हरिप्रसाद – ३०
तिप्पण्णप्पा कामकनूर – ३०
पी. व्ही. मोहन – २९
शिवण्णा मळवळी – ३०
विनय कार्तिक – ३२

भाजप
रघू कौटिल्य – २९
लिंगराज पाटील – २७

धजद
गोविंदराजू – १४ (पराभूत)

काँग्रेसला अतिरिक्त मतांचा फायदा

या निवडणुकीतील सर्वात महत्त्वाचा मुद्दा म्हणजे अतिरिक्त मतांचा काँग्रेसला झालेला लाभ. विधानसभा सदस्यसंख्येनुसार काँग्रेसला चार उमेदवार सहज निवडून आणता येणार होते. मात्र पाचव्या उमेदवारालाही विजय मिळाल्याने विरोधी पक्षातील काही आमदारांनी काँग्रेसच्या बाजूने मतदान केल्याची शक्यता व्यक्त होत आहे.

भाजपकडे विधानसभेत ६२ आमदारांचे संख्याबळ आहे. पक्षाने आपल्या दोन उमेदवारांना आवश्यक मते देऊन उर्वरित मते धजदच्या उमेदवाराला देण्याची रणनीती आखल्याचे सांगितले जात होते. मात्र भाजपच्या उमेदवारांनाच अपेक्षेपेक्षा कमी मते मिळाल्याने पक्षातील काही आमदारांनी क्रॉस व्होटिंग केल्याची चर्चा सुरू झाली आहे.

दुसरीकडे, धजदकडे केवळ १८ आमदार असून त्यांपैकी काहींनीही काँग्रेसला मतदान केल्याची शक्यता राजकीय वर्तुळात व्यक्त केली जात आहे. त्यामुळे काँग्रेसचा पाचवा उमेदवार विजयी झाल्याचे मानले जात आहे.

२२२ आमदारांनी बजावला मतदानाचा हक्क

२२४ सदस्यीय कर्नाटक विधानसभेत सध्या २२२ सदस्य आहेत. माजी मंत्री डी. सुधाकर यांच्या निधनामुळे आणि काँग्रेसचे आमदार विनय कुलकर्णी यांच्या अपात्रतेमुळे दोन जागा रिक्त होत्या. या निवडणुकीत विजयासाठी प्रथम पसंतीच्या किमान २८ मतांची आवश्यकता होती.

विधानसौधच्या कक्ष क्रमांक १०६ मध्ये मतदान पार पडले. मतदानानंतर सायंकाळी ५ वाजल्यापासून मतमोजणी सुरू झाली आणि काही तासांत निकाल जाहीर करण्यात आला.

मित्रपक्षाकडून ११ क्रॉस-व्होटिंग
राज्य विधानसभा निवडणुकीत उपलब्ध झालेल्या माहितीनुसार, भाजप आणि धजद आघाडी पक्षांनी एकूण ११ मते दिली आहेत. याचा अर्थ, भाजपच्या ७ आणि धजदच्या ४ आमदारांनी त्यांच्या पक्षाने उमेदवारी दिलेल्या उमेदवाराऐवजी काँग्रेसच्या उमेदवाराला मतदान केले आहे. याशिवाय, एका आमदाराचे मत अवैध ठरले आहे. निवडणूक अधिकाऱ्यांकडून अधिकृत माहिती मिळणे बाकी आहे.

शिवकुमार जिंकते
राज्यात मुख्यमंत्री झाल्यानंतर हायकमांडने पहिल्यांदाच सोपवलेल्या कार्यात डी. के. शिवकुमार यांनी अपेक्षेपेक्षाही अधिक यश मिळवले आहे. त्यांनी केवळ काँग्रेसचीच नव्हे, तर भाजप आणि धजदचीही ११ मते मिळवण्यात यश मिळवले आहे. अशाप्रकारे, मुख्यमंत्री झाल्यानंतर त्यांच्याकडे आलेले पहिलेच कार्य त्यांनी यशस्वीपणे पूर्ण केले आहे आणि हायकमांडसमोर एक संकटमोचक व राजकीय चातुर्य असलेली आपली क्षमता पुन्हा एकदा सिद्ध केली आहे.

काँग्रेससाठी मोठा राजकीय विजय

विधान परिषद निवडणुकीतील हा निकाल काँग्रेससाठी मोठा राजकीय विजय मानला जात आहे. अपेक्षित चार जागांऐवजी पाच जागांवर विजय मिळवून पक्षाने आपली संघटनात्मक ताकद दाखवून दिली आहे. दुसरीकडे धजदला उमेदवार निवडून आणण्यात अपयश आले असून भाजपमध्येही क्रॉस व्होटिंगबाबत आत्मपरीक्षणाची गरज निर्माण झाली आहे. आगामी राजकीय घडामोडींवर या निकालाचा परिणाम होण्याची शक्यता व्यक्त केली जात आहे.